Qazaqstandaǵy lotereıa naryǵynyń ortasha aınalymy 5 mlrd. teńgeni quraıdy - Sport agenttigi
ASTANA. 28 qazan. QazAqparat - Qazaqstandaǵy lotereıa naryǵynyń ortasha aınalymy jylyna 5 mlrd. teńgeni qurap otyr. Búgin Parlament Májilisinde «Lotereıalar jáne lotereıalar qyzmeti týraly» zań jobasynyń tanystyrylymy barysynda Sport jáne dene shynyqtyrý agenttiginiń tóraǵasy Erlan Qojaǵapanov osylaı málim etti.
«Budan bólek, osy naryqtaǵy aınalym aýqymdy bolǵanymen, aıtarlyqtaı problemalar barshylyq. Óıtkeni, salany retteýdiń naqty tetikteri qamtylǵan emes. Jekelegen jaǵdaılarda alaıaqtyq ta oryn alýda. Osynyń ózi halyqtyń lotereıaǵa senimin tómendetip otyr. Al halyq senimin qalpyna keltirý úshin birqatar ákimshiliktik júıeli sharalar qabyldaýdy qajet etedi», - dedi Sport jáne dene shynyqtyrý agenttiginiń tóraǵasy Erlan Qojaǵapanov.
Toqtala ketetin jaıt, lotereıalar álemdegi jyl saıynǵy on paıyzdyq kórsetkishpen ósip kele jatqan aýqymdy dınamıkalyq sala. Al Ulybrıtanııanyń ulttyq lotereıasy álemdegi lotereıa naryǵynyń eń tıimdisi bolyp tabylady, ony ótkizýden Úkimet pen qaıyrymdylyq uıymdardyń tabysy 5 mlrd. dollarǵa jetedi.
Salystyrmaly túrde alǵanda shet elderdegi jyl saıynǵy lotereıa aınalymy AQSh-ta - 30 mlrd dollar, Qytaıda - 15 mlrd dollardy, Ulybrıtanııada - 9,5 mlrd dollardy, Japonııada - 8 mlrd dollardy, Germanııada - 6 mlrd dollardy quraıdy. Al adam basyna shaqqandaǵy satýlar jyldyq eseppen Sıngapýrde - 1000 dollar, Grekııada - 600 dollar, AQSh-ta 200 dollar, Reseıde 10 dollardy qurap otyr.
