Qazaqstandaǵy qylmystyq isterdiń besten biri elektrondy tártipte tergelip jatyr
«Ózderińiz biletindeı, elimizde «Elektrondy qylmystyq is jobasy» júzege asyrylýda. Joba aıasynda sotqa deıingi qylmystyq isterdiń bárin elektrondy formatqa aýystyryp kelemiz. ıAǵnı, quqyqbuzýshylyq tirkelgennen bastap sot sheshim shyǵarǵanǵa deıin barlyǵy elektrondy formatta júrgiziledi. Aldaǵy ýaqytta biz jazany atqarý protsesin avtomattandyrǵymyz keledi. Atalǵan jobanyń bastapqy kezeńderi 2017 jyly bastalǵan bolatyn. 2018 jyldyń 1 qańtarynan bastap joba bastalyp ketti», - dedi OKQ-da Bas prokýratýranyń tsıfrlyq jobalaryn tanystyrǵan quzyrly organnyń quqyqtyq statıstıka jáne arnaıy esepke alý jónindegi komıteti tóraǵasynyń orynbasary Baǵlan Bekbaev.
Quzyrly organ ókiliniń aıtýyna qaraǵanda, atalmysh jobany sátti júzege asyrý úshin keıbir zańnamalarǵa ózgerister men tolyqtyrýlar engizilgen. Sondaı-aq, quqyq qorǵaý organdary arasynda kelisimge qol qoıylǵan.
«2018 jyly biz atalmysh jobany qylmystardyń jeńil túrin tergeý jumystaryna engizdik. Osy jyldan bastap elektrondy formatta ortasha deńgeıdegi qylmystar tergele bastady. 2021 jyldyń sońyna deıin qylmystyń barlyq túrin tergeýdi avtomattandyrý kózdelip otyr. Barlyq quqyq qorǵaý organdary atalmysh jumystyń ádisi ońtaıly ári qolaıly ekenin aıtýda. Máselen, 2018 jyldyń birinshi toqsanynda elektrondy qylmystyq isterdiń úlesi jalpy qylmystyq isterdiń ishinde bar-joǵy 0,9 paıyzǵa ıe edi. 2018 jyldyń sońynda bul kórsetkish 4,6 paıyzǵa ósti. Al qazirgi tańda barlyq qylmystyq isterdiń 18-20 paıyzy elektrondy tártipte tergelip jatyr», - dedi Baǵlan Bekbaev.
Onyń sózine sensek, atalmysh joba sotqa deıingi tergeý qyzmetkerleriniń jumysyn jeńildetip qana qoımaı, qylmystyq iske qatysýshylar men advokattarǵa birqatar basym múmkindikterdi berip otyr.
«Sot óndirisiniń ashyqtyǵy qamtamasyz etilip, materıaldy qoldan jasaý táýekelderi azaıdy. Tergeý protsesiniń ýaqyty da qysqardy», - dedi ol.
