Qazaqstandaǵy qus fabrıkalaryna qaýip tóndi - depýtat
ASTANA. QazAqparat - Parlament Májilisiniń depýtaty Roman Kım elimizde qus sharýashylyǵyn damytý úshin memlekettik jem qoryn qurýdy usyndy. Osy oraıda ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.
«Búginde qus sharýashylyǵyn azyq jemmen qamtamasyz etýde qaýipti jaǵdaı qalyptasty. Qus jeminiń tapshylyǵy baıqalýda jáne onyń baǵasynyń 2018 jyly 45 myńnan 75 myń teńgege deıin ósýi teris yqpal etti», - dedi depýtat.
Onyń sózine qaraǵanda, byltyr qus fabrıkalarynyń kóbisi túpkilikti ónimge sýbsıdııa túrinde memlekettik qoldaýdy tolyq kólemde almaǵany jaǵdaıdy qıyndata tústi. 2018 jylda tólenbegen sýbsıdııa somasy úsh mlrd teńgeden asty. Al 2019 jylda jumyrtqamen qamtamasyz etetin qus fabrıkalary úshin qajetti 12,3 mlrd teńgeniń tek 5,4 mlrd teńgesi tólenedi, ıaǵnı tapshylyq 7 mlrd teńgeni qurap otyr.
Sonymen qatar depýtat elektr energııasyna, qospa jemge, jabdyqtar men bólshekterge, dárýmenderge, veterınarlyq preparattarǵa shyǵyndar artqanyn atap ótti.
R. Kımniń paıymynsha, salada oryn alǵan osy jaǵdaı óndiris kóleminiń, jumys oryndarynyń qysqarýyna alyp kelýi múmkin. Bul turǵyda ınvestıtsııalyq jobalar tejelip, ishki naryq ımportty ónimmen tolyǵýy yqtımal. Nátıjesinde, buǵan deıin qol jetkizilgen jetistikterdi joǵaltyp alý qaýpi tónedi.
Joǵaryda aıtylǵandardy eskere otyryp, astyq komponentinde 600 myń tonna kólemindegi qus fabrıkalarynyń jartyjyldyq qajettigi boıynsha memlekettik jem qoryn qurý múmkindigin qarastyrý usynyldy. Atalǵan máseleni sheshkenshe, ıaǵnı óndiris qarqynyn saqtaý maqsatynda 2019 jyldyń astyǵy bastyrylǵanǵa deıin jeńildikti baǵamen qordan 300 myń tonna jemdik astyqty bólý suraldy.
Sonymen qatar R. Kım qus sharýashylyǵy salasynyń turaqty damýyn qamtamasyz etetin memlekettik dotatsııany saqtaý kerektigin aıtty.
