Qazaqstandaǵy kúrish qory ishki tutyný kóleminen 2 ese artyq

ASTANA. QazAqparat - Búgingi tańda Qazaqstandaǵy kúrish qory 144,7 myń tonnany jáne 225 myń tonna shala kúrishti quraıdy, ol qaıta óńdeýden keıin shamamen 112,5 myń tonna bolady. Qoımalarda barlyǵy 257,2 myń tonna taza kúrish bolady.

Bul týraly QazAqparat QR Aýyl sharýashlyǵy mınıstrliginiń resmı saıtyna silteme jasap habarlaıdy.

Jyl saıyn 97 myń tonna tutyný kezinde bul qorlar Qazaqstannyń osy ónimge degen ishki qajettiligin 2 eseden astam jabady. Sonymen qatar, bul kólemder 2023 jyldyń jańa ónimin alýǵa deıin jetkilikti bolady.

Jınalǵan kúrishtiń artyq mólsheri basqa elderge eksporttalady. Bıylǵy 9 aıda shetelge barlyǵy 70,6 myń tonna, onyń ishinde 39,2 myń tonna tazartylǵan kúrish jáne 31,4 myń tonna usaqtalǵan kúrish satyldy.

Aıta ketý kerek, Qazaqstan aýmaǵynda usaqtalǵan kúrishke suranys joq jáne onyń kóleminiń 70-80% syra óndirý úshin Reseıge eksporttalady. Tazartylǵan kúrish boıynsha bul elge eksport nebári 9,5 myń tonna, al usaqtalǵan kúrish kólemi 24,6 tonnany qurady.

Bul rette qazaqstandyq kúrishti shetelge shekteýsiz áketý kúrish daǵdarysyna qaýip tóndiredi degen aqparat shyndyqqa janaspaıdy.

Tazartylǵan kúrishtiń qunyna keletin bolsaq, qarasha aıynda onyń Qazaqstandaǵy kóterme baǵasy kelisine 340-390 teńge, óndirýshi zaýyttarda 256 teńge, bólshek saýdada quny 489 teńgeni qurady. Reseıde kúrishtiń kelisi kóterme saýdada 362,8 teńge (57 rýbl) baǵamen satylady.

«Jalpy, 2022 jyly Qazaqstanda kúrish daqyldary 87,8 myń ga qurady, olardan 486,5 myń tonna ónim jınaldy, onyń ishinde 444,6 myń tonna ónim Qyzylorda oblysynyń úlesine keledi»,-delingen habarlamada.