Qazaqstandaǵy qulandardyń sany 4000-nan asty
2019 jylǵy 11 qazan kúni «Barsakelmes» memlekettik tabıǵı qoryǵynan memlekettik «Altyn dala» rezervatynyń aýmaǵyndaǵy jabaıy tuıaqtylardy reıntrodýktsııalaý ortalyǵyna eki qulan ákelindi.
«Qazaqstandaǵy qulandy reıntrodýktsııalaý» jobasy 2017 jyly Qazaqstan bıoalýantúrlilikti saqtaý qaýymdastyǵymen jáne Norvegııa tabıǵatty qorǵaý ınstıtýymen birlesip qolǵa alynǵan.
Bizdiń elimizde qulan Qyzyl kitapqa engen jáne joǵalý qaýpi bar sırek kezdesetin janýarlar qatarynda. 2019 jyly Qazaqstandaǵy qulandardyń sany 4000-nan asady jáne birtindep ósip keledi, degenmen jarty ǵasyr buryn olardyń sany 100-den kóp bolmaǵan.
Janýarlardy birneshe kún buryn qazaqstandyq jáne sheteldik mamandandardyń birlesken toby ustady.
Sondaı-aq, janýarlardy ustaý barysynda olardy zertteý úshin jáne qorǵalýyn jaqsartý maqsatynda úsh qulanǵa GPS-habarlaǵysh qoıylǵan. Osylaısha Barsakelmes qoryǵynyń aýmaǵynda belgi qoıylǵan alty qulan júr.
Altyn Emel ulttyq saıabaǵynda habar taratqyshpen júrgen eki janýardy jáne Yrǵyz-Torǵaı rezervatyndaǵy eki qulandy esepteıtin bolsaq, Qazaqstan boıynsha on qulannan qundy aqparat alyp otyrmyz.
Shara Qazaqstan bıoalýantúrlilikti saqtaý qaýymdastyǵynyń, QR EGTRM Orman sharýashylyǵy jáne janýarlar dúnıesi komıtetiniń jáne sheteldik áriptesterdiń 2017 jyldan beri júzege asyryp kele jatqan Ortalyq Qazaqstandaǵy qulandardy reıntrodýktsııalaý jónindegi halyqaralyq jobasynyń biri bóligi bolyp sanalady.
Qulandardy ustap, jetkizýde Qazaqstan bıoalýantúrlilikti saqtaý qaýymdastyǵynyń, «Ohotzooprom» ÓB» RMQK Aýdýrý ortalyǵynyń, Barsakelmes qoryǵynyń, Qyzylorda jáne Qostanaı oblystyq aýmaqtyq ınspektsııalardyń, «Altyn dala» memlekettik tabıǵı rezervatynyń qyzmetkerleri, sondaı-aq, Aýstrııa, Frantsııa, Germanııa jáne Vengrııanyń mal dárigerleri qatysty.
