Qazaqstandaǵy qoımalarǵa gaz syımaı jatyr
ASTANA. QazAqparat - Aldaǵy ýaqytta "QazTransGaz" kompanııasy taǵy bir gaz qoımasyn ashýdy josparlap otyr, dep xabarlaıdy QazAqparat tilshisi.
"QazTransGaz" AQ transformatsııa jáne damý jónindegi bas dırektorynyń orynbasary Erqanat Temirxanovtyń aıtýynsha, aldaǵy ýaqytta kompanııanyń enshiles kásiporny - "Amangeldigazda" shıkizatty óndirý kólemin jylyna 500 mln tonnaǵa deıin jetkizý josparlanyp otyr. "Atalǵan kompanııa Jambyl oblysynda ornalasqan. Endi, 2018-2024 jyldarǵa deıin gaz salasyn damytý aıasynda biz "Amangeldigazdy" shıkizattyq baza retinde ǵana emes, iri gaz qoımasy retinde paıdalanýdy kózdep otyrmyz. Sebebi qazirdiń ózinde "Poltoratskoe", "Aqyrtóbe" men "Bozoı" barlyq shıkizatty syıǵyzdyra almaı jatyr", - deıdi Temirxanov.
Onyń aıtýynsha, aldaǵy ýaqytta Qytaıǵa gazdy tasymaldaý kólemin arttyrý aıasynda "Amangeldigazdy" ońtústiktiń taǵy bir iri gaz qoımasy retinde paıdalaný asa mańyzdy.
Aıta keteıik, qazirgi kezde Qazaqstanda úsh jerasty gaz qoımasy bar. "Poltoratskoe" men "Aqyrtóbe" ońtústikte ornalassa, Aqtóbe oblysynda "Bozoı" qoımasy bar. Úsheýine 4,65 mlrd kýb metr gaz syıady.
