Qazaqstandaǵy qos azamattyǵy bar qyzmetkerlerdi jumystan bosatý týraly usynys aıtyldy
NUR-SULTAN. QazAqparat – Senattyń jalpy otyrysynda depýtat Nurjan Nursıpatov qos azamattyǵy bar qyzmetkerlerdi jumystan bosatýǵa qatysty usynystar aıtty, dep habarlaıdy QazAqparat tilshisi.
«Memleket basshysy 2020 jylǵy Qazaqstan halqyna Joldaýynda memlekettik qyzmetshiler nemese kvazımemlekettik uıymdardyń basshylarynda qos azamattyq anyqtalǵan jaǵdaıda, olardy atqaratyn qyzmetinen bosatý qajettigi týraly atap ótti. Atalǵan tapsyrmany oryndaýdyń quqyqtyq sharasy retinde ótken jyldyń sońynda Eńbek kodeksine jáne «Memlekettik qyzmet týraly» Zańyna túzetýler engizildi», - dedi senator Іshki ister mınıstrligi men Memlekettik qyzmet isteri agenttigine joldaǵan depýtattyq saýalynda.
Oǵan sáıkes memlekettik qyzmet Qazaqstan Respýblıkasynyń azamattyǵyn joǵaltqan jaǵdaıda ǵana emes, sondaı-aq shet memlekettiń azamattyǵy anyqtalǵan kezde de toqtatylýǵa jatady. Al kvazımemlekettik sektor sýbektisiniń basshylary Qazaqstan Respýblıkasynyń azamaty bola tura, shet memlekettiń azamattyǵy tabylǵan jaǵdaıda eńbek sharty buzylady.
«Bizdińshe, qabyldanǵan sharalar odan ári júıeli jáne dáıekti damýdy qajet etedi. Ótkeni memlekettik qyzmetshilerde qos azamattyǵy bar faktiler áli de anyqtalyp jatyr. Mysaly, quqyq qorǵaý qyzmeti týraly, áskerı qyzmet jáne áskerı qyzmetshilerdiń mártebesi týraly , arnaýly memlekettik organdary týraly salalyq zańdarda shet memlekettiń azamattyǵy qyzmetten shyǵarý úshin derbes negiz retinde qaralmaıdy. Qyzmettiń erekshe túri bolyp sanalatyn joǵaryda atalǵan memlekettik organdar «Qazaqstan Respýblıkasynyń Ulttyq qaýipsizdigi týraly» Zańnyń 9-babymen ulttyq qaýipsizdikti qamtamasyz etý kúshterine jatqyzylǵandyqtan, kórsetilgen talapty, ıaǵnı qyzmeten shyǵarý negizin engizýdi ǵana emes, sondaı-aq aldyn alý sıpatyndaǵy sharalardy qabyldaýdy qaraý usynylady.
Sonymen qatar, memlekettik qyzmettiń erekshe túrinde qyzmet etetin adamdardyń shet memlekette turýǵa yqtııarhat alýyna tyıym salý máselesin qarastyrý usynylady», - dedi depýtat.
Osy oraıda ol tek memlekettik qyzmetke qabyldaý kezinde ǵana emes, sonymen qatar jumys istep júrgen kezde de qyzmet sharttaryna sáıkestigin anyqtaý úshin júrgiziletin arnaıy tekserýdi engizýdi qarastyrý kerektigin aıtty. Bul turǵyda basqa azamattyqty alǵan adamnyń otandyq pasportty paıdalanýy nemese sheteldik azamattyqty alý faktisi týraly habarlaý merzimderin buzǵany úshin ǵana kózdelgen ákimshilik jaýapkershilikke túzetý engizý talap etiledi.
«Qos azamattyq faktilerin anyqtaý máselelerine baılanysty halyqaralyq-quqyqtyq qujattar da ózektendirýdi qajet etedi», - dedi N. Nursıpatov.
Osy oraıda depýtat baıandalǵandy eskere kele, múddeli memlekettik organdarmen kelise otyryp tıisti aqparatty berýdi surady.
«Memleket basshysynyń joǵaryda kórsetilgen tapsyrmasyn jáne elimizdiń Negizgi Zańynyń 10-babynyń talaptaryn sapaly oryndaý baǵytynda qabyldanǵan sharalardyń tolyqtyǵy qamtamasyz etilgen be? Tıisti is-sharalardy zańnamalyq sıpatta jetildirý qajettigi bar ma? Osy másele boıynsha qazirgi halyqaralyq-quqyqtyq negiz ulttyq múddelerge sáıkes kele me nemese ony ózektilendirý ýaqyty keldi me?», - dep surady senator.
