Qazaqstandaǵy qoryqtardyń aýmaǵyndaǵy 20 kól tazartylatyn boldy
ASTANA. QazAqparat - Qazaqstandaǵy qoryqtardyń aýmaǵyndaǵy 20 kólde tazartý jumystary júrgiziledi. Bul týraly búgin Ortalyq kommýnıkatsııalar qyzmetindegi brıfıngte QR Qorshaǵan orta jáne sý resýrstary mınıstr Nurlan Qapparov málim etti.
«Qazaqstanda alǵash ret erekshe qorǵalatyn tabıǵı aýmaqtardaǵy 20 kóldi tazartý boıynsha jumystar júrgiziledi. Sonymen birge ózen arnalaryn tazartý jumystaryna aıryqsha mán beriledi», - dedi vedomstvo basshysy.
N. Qapparovtyń aıtýynsha, «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasyn júzege asyrýdyń ekinshi kezegi daıarlandy. Munymen qosa, 25 jańa sý ólsheý beketteriniń qurylysy qarastyrylyp otyr. Jalpy 2020 jylǵa deıin 195 sý ólsheý beketteri salynady dep kútilýde.
