Qazaqstandaǵy konfessııaaralyq kelisim úlgisine nazar aýdarý qajet - Chehııa mádenıet mınıstrliginiń ókili

NUR-SULTAN. QazAqparat – Praga qalasynda konfessııalar ókilderi dinaralyq dıalogtiń qazaqstandyq tájirıbesin talqylady, dep habarlaıdy QazAqparat QR Syrtqy ister mınıstrligine silteme jasap.

Qazaqstannyń Cheh Respýblıkasyndaǵy Elshiligi QR Aqparat jáne qoǵamdyq damý mınıstrligi janyndaǵy Konfessııaaralyq jáne órkenıetaralyq dıalogti damytý ortalyǵymen, sondaı-aq QR Ulttyq akademııalyq kitaphanasymen birlesip, Chehııa din ókilderiniń, ǵylymı jáne sarapshy toptardyń, buqaralyq aqparat quraldary ókilderiniń qatysýymen dóńgelek ústel ótkizdi.

Qazaqstan tarapynan onlaın formatta Qazaqstan halqy Assambleıasy tóraǵasynyń orynbasary Marat Ázilhanov, Konfessııaaralyq jáne órkenıetaralyq dıalogti damytý ortalyǵynyń basshysy Bolat Sársenbaev, óńirlik QHA (Assambleıa) ókilderi, Qazaqstannyń din ókilderi, BAQ ókilderi qatysty.

«Qazaqstandyq konfessııaaralyq kelisimniń biregeı úlgisine nazar aýdarý qajet, onsyz Qazaqstan ómiriniń barlyq salalarynda áserli tabystar bolmas edi. Qazaqstan saıası jáne áleýmettik-ekonomıkalyq turaqtylyq, azamattyq beıbitshilik pen barlyq konfessııalar arasyndaǵy kelisim saqtalǵan memleket bolyp qala beredi», - dedi Cheh Respýblıkasynyń Mádenıet mınıstrligi Óńirlik mádenıetti damytý departamentiniń dırektory Zýzana Malkova.

Dóńgelek ústelge qatysýshylar memlekettik-konfessııalyq qatynastar salasyndaǵy ózekti máselelerdi, jalpyulttyq ıdeıa negizinde qazaqstandyq biregeılikti nyǵaıtý mindetterin, dinaralyq dıalog pen ózara túsinistikti ilgeriletýdegi azamattyq qoǵamnyń ósip kele jatqan rólin talqylady.

«Etnosaralyq kelisim máseleleri Qazaqstan qoǵamynyń nazarynda jáne osynyń arqasynda respýblıka senim, yntymaqtastyq jáne ózara túsinistik erekshe atmosferasy ornaǵan beıbitshilikti qamtamasyz etýdiń eń tıimdi júıeleriniń birine ıe boldy», - dedi Cheh Respýblıkasy Ýspensk sobory ǵıbadathanasynyń basshysy Roman Gaıdamachenkov.

Foto: gov.kz