Qazaqstandaǵy kóne eskertkishterdi sheteldik ǵalymdar zertteýde
Dóńgelek ústel jumysyna Nara ǵylymı-zertteý ınstıtýtynyń professory Sadakatsý Kýnıtake (Japonııa) jáne tanymal ǵalymdar men mamandar, qoǵam qaıratkerleri, Germanııa, Reseı, Japonııa elshilikteriniń jáne Qazaqstan Respýblıkasy mádenıet jáne sport mınıstrliginiń ókilderi qatysty.
Shara barysynda bes jyldyq «PALEO SILK ROAD» baǵdarlamasy aıasyndaǵy QR Ulttyq mýzeıi men Tıýbıngen ýnıversıtetiniń (Germanııa) halyqaralyq birlesken ekspedıtsııasynyń birinshi jylǵy jumysy qorytyndylandy.
«Búgingi ótip jatqan sharanyń mańyzy zor. Elbasymyzdyń «Rýhanı jańǵyrý» baǵdarlamasy aıasynda ulttyq qundylyqtarymyzben qatar, mádenıetimiz, tarıhymyzdy damytý, qazirgi qoǵamǵa qajetti baǵaly muralardy qaıta jańǵyrtý júıeli túrde qolǵa alynyp jatqany belgili. Búgin Ulttyq mýzeıde kópshilik nazaryna usynylyp otyrǵan ózge memleketter men Qazaqstan ǵalymdarynyń birge jasaǵan ekspedıtsııa jumystary - atalǵan baǵdarlamanyń joǵary nátıjesi. Ekspedıtsııa mamyr aıynda bastalǵan. Onyń nátıjesi ǵylym salasyndaǵy tyń jańalyqtar bolmaq», - dedi QR Mádenıet jáne sport mınıstrliginiń Jaýapty hatshysy Qýatjan Ýalıev.
Stratıfıkatsııalanǵan paleolıt eskertkishterin izdeý boıynsha júrgizilgen Maıbulaq keıingi paleolıt turaǵy jáne Shyǵys Qazaqstan óńirindegi qazba jumystaryna Qazaqstan Respýblıkasy ulttyq mýzeıiniń ǵalymdary, Germanııa, Ulybrıtanııa, AQSh, Kanada, Úndistan, Chehııanyń ǵylymı mekemeleriniń ókilderi qatysty.
