Qazaqstandaǵy kolledjderdi jańartýǵa 1 mlrd teńgege jýyq qarajat qarastyrylady
ASTANA. QazAqparat - Jergilikti bıýdjetterden elimizdiń kolledjderiniń tehnıkalyq bazasyn, jabdyqtaryn jańartýǵa 1 mlrd teńgege jýyq qarajat qarastyrylyp otyr. Bul týraly búgin Májiliste tegin tehnıkalyq jáne kásibı bilim berý tetigin engizý máselelerine arnalǵan dóńgelek ústelde QR Bilim jáne ǵylym mınıstri Erlan Saǵadıev málim etti.
Mınıstrdiń aıtýynsha, aldaǵy ýaqytta kolledjder men kásiptik tehnıkalyq bilim berý oryndarynyń sheberhanalaryn zamanaýı jabdyqtarmen jańartý josparlanyp otyr. Bul ondaǵy bilim berý sapasyna ǵana emes kolledjderdiń bedeline de áser etetin bolady. «Biz bul máseleni bir jaǵynan ishinara Densaýlyq saqtaý jáne áleýmettik damý mınıstrliginiń jobalary arqyly Dúnıejúzilik bank qarajaty esebinen sheshýge kúsh salamyz. Bul jobalar boıynsha elimizdegi 64 kolledjdiń oqý-óndiristik sheberhanasyn zamanaýı jabdyqtarmen jańartý qarastyrylady», - dedi E.Saǵadıev.
Vedomstvo basshysynyń aıtýynsha, bilim jáne ǵylymdy damytýdyń memlekettik baǵdarlamasy aıasynda dál osy maqsattarǵa jergilikti bıýdjetten 993 mln teńge qarastyrylǵan.
