Qazaqstandaǵy kolledjderde bilim alýǵa 97 myń grant bólindi
Qabyldaý rásimi jańa erejeler boıynsha júrgiziledi jáne tegin bilim alǵysy keletinder úshin kvotalar tizimi keńeıtildi. Bul jańashyldyqtar týraly QR BǴM Tehnıkalyq jáne kásiptik bilim departamentiniń dırektory Nasymjan Ospanova aıtyp berdi.
«Bıyl pedagogıkalyq, medıtsınalyq jáne shyǵarmashylyq mamandyqtardy qospaǵanda, qabyldaý emtıhandary bolmaıdy. Konkýrs attestattaǵy mindetti jáne beıindik pánderdiń ortasha baly boıynsha ótkiziledi. Odan basqa, bilim berýdiń ashyqtyǵy men qoljetimdiligin qamtamasyz etý úshin QR BǴM «aqsha stýdentpen birge júredi» qaǵıdaty negizinde granttardy bólýdiń jańa tetigin ázirledi. ıAǵnı, buryn granttar kolledjder arasynda bólingen bolsa, endi olar talapkerlerdiń tańdaýy boıynsha beriledi. Memlekettik tapsyrys talapkerlerdiń tańdaýy boıynsha kolledjder arasynda ornalastyrylmaq», - deıdi N. Ospanova vedomstvonyń Facebook-tegi paraqshasynda.
Tehnıkalyq jáne kásiptik bilim berý uıymdaryna qabyldaý 25 maýsymnan bastalady. Talapkerler kolledjge qujattardy eki tásilmen – elektrondyq úkimet portaly Egov.kz arqyly nemese tikeleı kolledjge tapsyra alady.
Bolashaq stýdentterdiń 4 mamandyq pen 4 kolledjge deıin tańdaý quqyǵy bar. Konkýrs attestattaǵy mindetti jáne beıindik pánderden qoıylǵan baǵanyń ortasha konkýrstyq baly boıynsha aqparattyq júıe arqyly ótkiziledi. Pedagogıkalyq, medıtsınalyq jáne shyǵarmashylyq mamandyqtarda oqyǵysy keletin túlekter arnaıy nemese shyǵarmashylyq emtıhandar tapsyryp, suhbattasýdan ótedi. Arnaıy nemese shyǵarmashylyq emtıhandardy kolledjder janynan qurylǵan komıssııalar júrgizedi.
«Konkýrs 2 kezeńge bólingen. Birinshi 9-synyp negizinde oqýǵa túsetin talapkerler arasynda memlekettik tapsyrysty bólý 19-22 tamyz aralyǵynda, al, 11 synyp túlekteri úshin – 22-25 tamyz aralyǵynda ótedi. Igerilmegen oryndar bolǵan jaǵdaıda bilim grantymen qamtylmaǵan talapkerler arasynda memlekettik bilim berý tapsyrysyn qaıta bólý júrgiziledi. Memlekettik tapsyrys boıynsha oqýǵa qabyldaý týraly aqparat talapkerdiń jeke kabınetine keledi. Kolledjderge qabyldaý 31 tamyzda aıaqtalady», – dep atap ótti QR BǴM Tehnıkalyq jáne kásiptik bilim departamentiniń dırektory Nasymjan Ospanova.
Bilim mınıstrliginiń habarlaýynsha, elimizde 795 kolledj jumys isteıdi. Onyń 454-i – memlekettik oqý oryndary. Granttardy 435 memlekettik kolledj jáne 170 jeke menshik kolledj alady. 2021-2022 oqý jylyna memlekettik bilim berý tapsyrysy 10 baǵyt jáne 200-den astam suranysqa ıe mamandyqtar boıynsha 97 myń orynǵa bólindi.
«Bıyl kvotalyq sanattar tizimi keńeıtildi, endi kvotalar 9 sanat boıynsha qarastyrylady. Kóp balaly otbasylardan shyqqan balalar úshin 5%, mártebesi keminde úsh jyl tolyq emes otbasy balalaryna 1%, bala kezinen múgedek balalardy tárbıelep otyrǵan otbasylardan shyqqan talapkerler men birinshi jáne ekinshi toptaǵy múgedekter úshin 1% kvota qosyldy. Baldar teń bolǵan jaǵdaıda kvotalyq sanat jáne attestattyń ortasha baly eskeriledi», – dep atap ótti Nasymjan Ospanova.
Sonymen birge, bıyl alǵash ret barlyq túlekterge bilim basqarmalarynyń aqparattyq júıeleri arqyly kásibı dıagnostıkadan ótý múmkindigi beriledi. Dıagnostıka túlekterge mamandyq tańdaýda kómektesýge arnalǵan jáne usynymdyq sıpatqa ıe.
