Qazaqstandaǵy qoqys jınaıtyn oryndar zańsyz jumys isteýde
ASTANA. QazAqparat - Búgin QR Parlamenti Senatynda «Óńir» depýtattyq tobynyń otyrysy ótip, onda qatty qaldyqtardy qaıta óńdeý máseleleri qaraldy, dep habarlaıdy QazAqparat.
Otyrysta sóz alǵan Senat tóraǵasynyń orynbasary Sergeı Gromovtyń aıtýynsha, Qazaqstannyń ekonomıkalyq ósimimen qatar qatty qaldyqtar kóleminiń de arta túsýi baıqalady. Osyǵan oraı elimizde bul máseleni sheshý joldary kózdelgen arnaıy tujyrymdama qabyldanǵan. Tujyrymdama 2030 jylǵa qaraı qaldyqtardy qaıta óńdeýdi 40 protsentke, 2050 jylǵa qaraı 50 protsentke jetkizýdi kózdeıdi. Munan bólek, ol 2030 jylǵa qaraı elimizdegi qatty turmystyq qaldyqtarǵa arnalǵan polıgondardyń 95 paıyzǵa jýyǵyn ekologııalyq talaptar men sanıtarlyq erejelerge sáıkestendirý josparlanyp otyrǵandyǵyn atap ótti.
«2016 jyly respýblıkada qaıta óńdelgen qatty turmystyq qaldyqtardyń kólemi ókinishke oraı nebári 2,6 protsent qana boldy. Qyzmet túrimen halyqtyń 60 paıyzy qamtylyp, polıgondardyń 15 paıyzy zańdastyryldy. Al endi qalǵan 85 protsent polıgon zańsyz jumys isteýde», - dedi Sergeı Gromov.
Onyń derekterinshe, el óńirlerinde qaldyqtardy suryptap, qaıta óńdeýmen aınalysatyn 100-den astam shaǵyn jáne orta bıznes kásiporny jumys isteýde. Biraq, barlyq aımaqta birdeı qaldyqtardyń jekelegen túrleri qaıta óńdelmeıdi. Bul problemany keshendi sheshý joldary da joq.
