«Qazaqstandaǵy klımattyń ózgerýi» konkýrsynyń jeńimpazdary belgili boldy

NUR-SULTAN. QazAqparat – BUU «Qazaqstandaǵy klımattyń ózgerýi» taqyrybymen ótken BAQ ókilderi arasyndaǵy baıqaýdyń qorytyndysyn jarııalady, dep habarlaıdy QazAqparat tilshisi.

Baıdaq qorytyndysyn ortalyq kommýnıkatsııalar qyzmetinde ótken baspasóz máslıhatynda BUU-nyń Qazaqstan Respýblıkasyndaǵy turaqty úılestirýshisi Mıkaela Frıberg-Storı jarııalady.

«Baıqaý kezinde búkil Qazaqstannan jalpy sany 50-ge jýyq maqala kelip tústi. Materıaldardyń bári BUU-nyń muqııat súzgisinen ótti. Baǵalaý ońaı bolǵan joq. Klımattyń ózgerýi, bıoalýandyq, ekojúıensi saqtaý máselelerin qozǵaǵan, tereń oı týyndatatyn maqalalar kóp boldy. Sondyqtan jeńimpazdy anyqtaý qıyn boldy. Biz bul maqalalardy shyǵarmashylyq deńgeıine, zertteýdiń tereńdigine, stıline mán berdik. Óıtkeni bul maqalalar memleket qaıratkerlerin, ózge de tulǵalardy bul problemaǵa beıjaı qaramaýǵa shabyttandyrýy kerek edi», - degen BUU ókili jeńimpazdardyń esimin atady.

Sonymen baıqaýdyń úshinshi oryn ıegeri – Elorda aqparat aqparat agenttiginiń jýrnalısi Dýlat Tólepov BUU sertıfıkaty men 350 myń teńgeniń vaýcherin ıelendi.

Ekinshi oryn ıegeri CABAR Asia tilshisi Zýlfııa Raısovaǵa 650 myń teńge vaýcheri buıyrdy.

«Birinshi oryn alǵan Astana Times jýrnalısi Janna Shaıahmetovaǵa 1 mln teńge vaýcheri beriledi», - dedi Mıkaela Frıberg-Storı.