Qazaqstandaǵy kezekten tys prezıdenttik saılaýǵa daıyndyq uıymdasqan túrde ótip jatyr - TMD mıssııasy baıqaýshylarynyń basshysy
ASTANA. 31 naýryz. QazAqparat /Aıdar Ospanalıev/ -Qazaqstandaǵy kezekten tys Prezıdenttik saılaýǵa daıyndyq uıymdasqan túrde ótip jatyr. Táýelsiz memleketter dostastyǵy uıymy mıssııasy baıqaýshylarynyń basshysy Sergeı Lebedev elimizde ótkeli otyrǵan kezekten tys prezıdent saılaýynyń daıyndyq barysyna osyndaı baǵa berdi.
«Árıne, jumys bolǵan soń kemshiliksiz bolmaıdy. Sondyqtan saılaýǵa daıyndyq barysynda azdaǵan bolsa da kemshilikter boldy. Degenmen, ol kemshilikterdiń barlyǵy tehnıkalyq kemshilikter. Eń bastysy elde saılaýshylardyń quqyqtary buzylyp jatyr nemese kandıdattardyń quqyqtary buzyldy degen syńaıdaǵy áńgimeler joq», - dedi mıssııa basshysy.
Onyń sózine qaraǵanda, TMD baıqaýshylary saılaý ýchaskeleri ashylǵanda-aq qyzmetterine kirisedi. «Biz saılaý ýchaskelerinen daýystardy sanaý sharasy bastalǵanda ketemiz. Men ózim Aqmola oblysyndaǵy jáne Astanadaǵy saılaý ýchaskelerinde bolamyn»,- dedi S.Lebedev.
Onyń sózinshe, TMD men ózge de halyqaralyq uıymdardyń mıssııa ókilderi 3 sáýir kúni tústen keıin kezdesedi. Sol kezdesýde kezekten tys Prezıdent saılaýyna beriler baǵa birshama pysyqtalady. «Alaıda halyqaralyq uıymdardyń barlyǵynyń saılaýǵa bergen baǵalary birdeı bolady dep aıta almaımyn. Biraq halyqaralyq uıymdardyń barlyǵy birdeı obektıvti bolsa, olardyń kezekten tys saılaýǵa bergen baǵalary da uqsas bolýy kerek degen oıdamyn»,- dedi mıssııa basshysy.
