Qazaqstandaǵy kedendik baqylaýdyń tıimdiligi eki esege artty - Qarjy mınıstri

ASTANA. Qazaqparat - Elimizde kedendik baqylaýdyń tıimdiliginiń artýy baıqalyp otyr. Búgin halyqqa esep berý kezdesýinde Qazaqstan Respýblıkasynyń Qarjy mınıstri Baqyt Sultanov osylaı málim etti, dep habarlaıdy «QazAqparat» HAA tilshisi.

Qarjy mınıstriniń aıtýynsha, osy salaǵa jaýapty mekemelerdiń birlese otyryp júrgizgen taldaý jumysy oń áserin bergen.

«Bul qadam kedendik baqylaý kezindegi sýbektilerdi tıimdi túrde tańdaýǵa múmkindik berdi. Osynyń arqasynda búgingi kúni keden baqylaýynyń tıimdiligi eki esege artyp otyr. Qazirgi ýaqytta 36-dan 16 paıyzǵa deıin tómendegenimen, taýar aınalymyna qatysty kedendik baqylaýdy 5,6 paıyzǵa deıingi kórsetkishke jetkizýdi josparlap otyrmyz», - dedi Qarjy mınıstri.

Sondaı-aq, Baqyt Sultanov kedendik rásimderdi ońtaılatý baǵytynda jumys júrgizilip, «Arıs» baǵdarlamasy arqyly bıznes-protsester jeńildetilip jatqanyn tilge tıek etti.

Eske sala ketsek, búgin QR Qarjy mınıstri Baqyt Sultanov halyqqa esep berý kezdesýin ótkizýde.