Qazaqstandaǵy qaýipti óndiristerde 11 apat boldy - Úkimet otyrysy
ASTANA. QazAqparat - Aǵymdaǵy jyly Qazaqstandaǵy qaýipti óndiristik nysandarda 11 apat boldy. Bul týraly Úkimet otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Aǵymdaǵy jyldyń 10 aıy ishinde respýblıkanyń qaýipti óndiristik nysandarynda 11 apat oryn aldy, al 2016 jyldyń dál osy kezeńinde 14 apat bolǵan (21 paıyzǵa tómendedi). 12 adam zardap shegip, 4 adam qaza tapty», - dedi mınıstr.
Búginde mınıstrliktiń qadaǵalaýynda 230 myńnan asa qaýipti óndiristik nysandy qamtıtyn 9 myńnan asa kásiporyn bar. Osy oraıda jerasty kenishteri men kómir shahtalary, karerler men razrezder, munaı jáne gaz óndirý ken oryndary, metallýrgııa, sondaı-aq hımııa, munaı óńdeý zaýyttary, atom ónerkásibi, magıstraldyq qubyrlar qamtylǵan.
Vedomstvo basshysynyń aıtýynsha, sońǵy jyldarda qaýipti óndiristik nysandardyń apatsyz jumysy boıynsha oń qarqyn baıqalýda.
«Osylaısha, 2016 jylǵy apattardyń sany 2008 jylmen salystyrǵanda 60 paıyzǵa (58-den 23 apatqa) azaıdy. Apat nátıjesinde zardap shekkender sany 4 esege (102 adamnan 28 adamǵa) tómendegen», - dedi Jeńis Qasymbek.
Belgili bolǵandaı, keste boıynsha tekserýge tek táýekeli joǵary dárejeli nysandar ǵana tartylady. Qalǵan nysandarǵa jospardan tys tekserýler jáne baqylaýdyń basqa túrleri júrgiziledi.
«Óreskel buzýshylyqtar bolmasa, adal kásipkerlerdi tekserýden bosatý túrinde kótermeleý, sondaı-aq olardy qaýipti óndiristik nysandar tizbesinen alyp tastaý múmkindigi kózdelgen. 2017 jyldyń 10 aıy ishinde 1558 tekserý júrgizilgen, olardyń arasynda kestege sáıkes - 923, jospardan tys - 635», - dedi mınıstr.
Tekserý barysynda 40 myńnan asa buzýshylyq anyqtaldy, adamdardyń ómiri men densaýlyǵyna qaýip tóndirip turǵan 880 qaýipti óndiristik nysan ýaqytsha toqtatyldy. Sonymen qatar 124,5 mln teńgeden asa somada 1821 aıyppul salyndy.
