Qazaqstandaǵy kásiporyndar 26,6 mln. tonna astyqty saqtaýǵa qaýqarly
ASTANA. QazAqparat - Qazirgi kezde respýblıkada 204 lıtsenzııalanǵan astyq qabyldaý kásiporyndary bar. Bul týraly búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti.
«Búgingi jaǵdaı boıynsha AQK-larda saqtaýǵa 2,3 mln. tonnadan astam astyq qabyldandy, onyń 1,8 mln. tonnasy bıdaı. Ylǵaldylyǵy 14,5 paıyzǵa deıin bolatyn astyqtyń úlesi jalpy kólemniń 74 paıyzdy qurap otyr»,-dedi Q. Aıtýǵanov.
Onyń sózine qaraǵanda, qazirgi kezde respýblıkada 204 lıtsenzııalanǵan astyq qabyldaý kásiporyndary jumys jasaıdy, olardyń jalpy saqtaý sıymdylyǵy 13,6 mln. tonna. Budan basqa aýyl sharýashylyǵy taýarlaryn óndirýshilerde 13 mln. tonnany saqtaý sıymdylyqtary bar.
«Demek, jalpy kólemi 26,6 mln. tonna bolatyn qoldaǵy bar astyq saqtaý sıymdylyqtary astyqtyń ótken jylǵy qaldyǵyn qosa eseptegende jańa eginniń astyǵyn saqtaýǵa jetkilikti»,-dedi ol.
Mınıstrlik málimetine qaraǵanda, jalpy respýblıka boıynsha dándi daqyldardyń aýrýlary (septorıoz, sary tat) boıynsha óńdeý 2,4 mln. gektardan astam alqapta júrgizilgen (onyń ishinde Aqmola oblysynda - 874,4 myń ga, Shyǵys Qazaqstan - 48,4 myń ga, Qaraǵandy - 10,2 myń ga, Qostanaı - 625,8 myń ga, Pavlodar - 5,1 myń ga, Soltústik Qazaqstan oblysynda - 846,5 myń ga), bul ótken jyldaǵydan 1,1 mln. gektarǵa artyq.
