Qazaqstandaǵy kásipkerler men volonterler qandaı jumystar jasap jatyr

NUR-SULTAN. QazAqparat – Búginnen bastap koronavırýsqa baılanysty Almaty men Nur-Sultan qalalarynda karantın engizildi. Vırýs taramaýy úshin jergilikti ákimdikter jabylatyn oryndardy belgilep, qalalarǵa kirip-shyǵý máselesin pysyqtady. Sonymen qatar, QR Іshki ister mınıstri Erlan Turǵymbaev blok-posttardan kimder kedergisiz óte alatynyn túsindirdi. Osy oraıda «QazAqparat» agenttigi elimiz qaýipti ınfektsııaǵa baılanysty synaqtan ótip jatqan kezeńinde kómegin aıamaǵan kásipkerler men volonterlerdiń áreketine sholý usynady.

Qyzylorda oblysyndaǵy ıgi sharalar

Koronavırýs (COVID-19) týraly aqparatty aýdan halqynyń biri bilse biri bilmeıdi jáne aldyn-alý sharalaryn qabyldaýǵa aqparattyń azdyǵy óz áserin tıgizeri sózsiz. Osy maqstatta aýdandyq Jastar resýrstyq ortalyǵy jáne Syrdarııa agrarly-tehnıkalyq kolledji janynan qurylǵan eriktiler komıteti músheleri Koronavırýstyń aldyn alý jáne belgileri boıynsha aqparattyq-tanymdyq materıaldardy turǵyndarǵa taratyp, halyq kóp shoǵyrlanatyn oryndar, aıaldamalar men qoǵamdyq kólikterge jadynamalar ornaldastyrdy.

Bul ıgi sharanyń maqsaty - dúnıejúzine qaýip tóńdirip otyrǵan qaýipti aýrýdyń aldyn alý boıynsha turǵyndardy aqparattandyrý. Qoǵamǵa qaýipti indetpen kúresýge aýdan jurtshylyǵy daıyn bolýy qajet.

Munymen qosa, koronavırýstyń Shıeli aýmaǵyna taralýyna jol bermeý jóninde tıisti sharalar uıymdastyryldy.

Bul rette eriktiler tobynyń qatysýymen arnaıy ázirlengen jadynamalardy halyq kóp shoǵyrlanatyn oryndarda, ortalyq saparjaıda, bazarda, «Bereke», «Bota» saýda úıleriniń aqparattyq taqtasyna japsyrylyp, túsindirme jumystary júrgizildi.

Beıneýde volonter jastar erledi...

«Memleket basshysy elimizde koronavırýstyq ınfektsııanyń odan ári taralýyna jol bermeý úshin el aýmaǵynda 16 naýryz ben 15 sáýir aralyǵynda tótenshe jaǵdaı jarııalaǵan bolatyn. Qazirgi tańda aýdanymyzda dárihanalarda maskanyń jetispeýshiligi týyndap otyr. Aýdandyq jastar resýrstyq ortalyǵy janynan qurylǵan erikti jastar aýdanymyzdaǵy tigin sheberhanalarymen birge maska tigý jumystaryn bastap ketti», - dep jazylǵan Beıneý aýdandyq jastar resýrstyq ortalyǵynyń áleýmettik jelidegi paraqshasynda.

Qazirgi tańda 14 tigin sheberhanalarymen kelissózder júrgizilip, kúnine eki myń dana maska tigý jumystar jalǵasýda. Tigilgen maskalar dárihanalarǵa tapsyrylady.

Sonymen qatar, aýdandyq jastar resýrstyq ortalyǵy janyndaǵy erikti jastar ortalyqta tikken betperdelerin halyqqa qyzmet kórsetý ortalyǵynyń mamandaryna tegin taratty.

Óskemen jastary qarttarǵa dári-dármek jetkizedi

Óskemen qalasynda koronavırýstyń aldyn alý maqsatynda eriktilerdiń bastamasymen qarttarǵa jáne múmkindigi shekteýli adamdarǵa azyq-túlik pen dári-dármek jetkizý qyzmeti quryldy .

Kómek kórsetý suraqtary boıynsha [phone], 25-01-90 telefondaryna habarlasýǵa bolady.

Bul qyzmetter «Nur Otan» partııasy Óskemen fılıaly men qalalyq volonterler ortalyǵynda ornalasqan.

Elordalyq kásipker turǵyndarǵa tegin maska taratty

Nur-Sultan qalasyndaǵy kásipker Ernur Bolatuly jýnalıster men qala turǵyndaryna, kóshe tazalyǵyna jumyldyrylǵan adamdarǵa tegin maska taratty.

«Bul elimizdiń, tipti búkil álemniń basyna túsken synaq. Osyndaı jaǵdaıda bul dertpen búkil adamzat balasy birlesip kúresýi tıis. Ókinishke oraı, bir-birimizge qol úshin bergenniń ornyna, qajetti zattardyń baǵasyn kóterip, maskilerdi qymbatqa satyp jatqan keıbir alypsatarlardyń isi meni qatty oılandyrdy. Qolymnan kelgenshe solardyń qolyndaǵy maskalardy jınap alyp, halyqqa tegin tarataıyn dep sheshtim. Barlyqtaryńyzǵa belgili, bıyl Volonterler jyly. Osy oraıda barlyq kásipkerlerdi qıyn kúnde halyqpen birge bolýǵa shaqyramyn», - deıdi E. Bolatuly.