Qazaqstandaǵy qar barysynyń sany qansha
ASTANA. QazAqparat -QR AShM Orman sharýashylyǵy men janýarlar dúnıesi komıteti tóraǵasynyń orynbasary Qaırat Ústemirov Qazaqstanda mekendeıtin qar barysynyń mólsherli sanyn atady, dep habarlaıdy «QazAqparat» HAA tilshisi.
«Sońǵy 10 jyldyń ishinde qar barysyn aýlaý faktisi elimizde tirkelgen joq. Qazir Qazaqstannyń bıik taýly óńirlerinde fototuzaqtar qoıylyp, naqty qar barysynyń sanyn anyqtaý boıynsha jumystar júrip jatyr. Búgingi tańda Qazaqstanda shamamen 138 qar barysy bar dep boljam jasap otyrmyz», - deıdi komıtet ókili.
Qaırat Ústemirovtiń aıtýynsha, Shymkenttegi Saıram-Ógem memlekettik ulttyq tabıǵı parkindegi fototuzaqqa jýyqta qar barysy túsip qalǵan. Almaty óńiri jáne Shyǵys Qazaqstan oblysynyń Katonqaraǵaı aýdanyndaǵy ulttyq parkterde ornatylǵan fototuzaqtar da ol óńirlerde qar barysynyń mekendeıtinin dáleldep otyr.
