Qazaqstandaǵy qanttyń 58% shetelden jetkiziledi - vıtse-mınıstr
«Importqa táýeldiliktiń joǵary bolýyna baılanysty qant salasyn damytý máselesi ózekti bolyp otyr. Aýyl sharýashylyǵy taýaryn óndirýshilerdiń shaǵyn bolýy, ımporttyq tuqym qunynyń qymbattyǵy, fermerlerdiń jetkilikti tehnıkalyq jaraqtanbaýy jáne sýmen qamtamasyz etý problemalaryna baılanysty 90-jyldardan bastap qant qyzylshasynyń egis alqaby 85 myń gektardan 11,6 myń gektarǵa deıin tómendegen. Taldaý kórsetkendeı, basqa daqyldardy (mysaly kartop, júgeri) ósirýdiń tıimdiligi qant qyzylshasyna qaraǵanda birneshe ese joǵary», - deıdi Á. Tamabek Úkimettiń búgingi otyrysynda.
Vıtse-mınıstrdiń aıtýynsha, respýblıka boıynsha jylyna 532 myń tonna qant tutynylady, onyń ishinde otandyq shıkizat, ıaǵnı qant qyzylshasy esebinen qamtamasyz etý deńgeıi 7%-dy, otandyq zaýyttardyń quraq qantyn óńdeý esebinen – 35%-dy quraıdy, 58% qant ımportqa tıesili.
«Degenmen, elimizde qant salasynyń tabysty damýy úshin negizgi alǵysharttar bar, olar – sýarmaly jerlerdiń bolýy, ishki naryqtyń úlken syıymdylyǵy, qajettilikti qamtamasyz etýge qabiletti jumys istep turǵan 4 zaýyttyń júkteý qýatynyń tolyq paıdalanylmaýy jáne jumys kúshiniń bolýy. Alaıda, tehnologııalyq jabdyqtardyń tozýyna, zaýyttardyń nesıeleriniń kóptigine jáne aınalym qarajatynyń tapshylyǵyna, kórshi elder qoldanatyn baǵa dempıngine baılanysty otandyq zaýyttardyń júkteme qýaty tómen bolyp otyr», - deıdi QR AShM ókili.
