Qazaqstandaǵy qalalarda qandaı shyrshalar tur
NUR-SULTAN. QazAqparat – Elordada 22 jeltoqsanda elimizdiń bas shyrshasynyń shamdary jarqyrady. Odan keıin bul úrdis ózge óńirlerde de jalǵasyn tapty. Keı óńirde saltanatty shara onlaın rejımde ótse, keı óńirde shyrsha mańynda sanaýly ata-ana men bala ǵana boldy, dep habarlaıdy QazAqparat tilshisi.
22 jeltoqsan kúni keshki saǵat 20:00-de astanadaǵy barlyq shyrshanyń shamy jandy.
Qala turǵyndary men qonaqtary EXPO kesheni mańyna jınaldy. Elimizdiń bas shyrshasy osy jerge ornatylǵan. Jalpy, Nur-Sultannyń túkpir-túkpirine uzyn-yrǵasy 30 jańajyldyq shyrsha qoıylǵan.
Sondaı-aq, Nur-Sultan qalasyndaǵy Báıterek monýmenti janyna quraq kórpeden jasalǵan shyrsha qoıyldy.
Erekshe shyrshanyń bıiktigi – 6 metr, quraqtyń uzyndyǵy – 70 myń metr, ony jasaýǵa 200-den astam adam atsalysqan.
Almaty ákimdiginiń ókilderi jańajyldyq shyrsha men qalany bezendirýge aqsha bólinbegenin málim etti. Merekege oraı mádenıet basqarmasynyń vedomstvoǵa qarasty mekemeleri 25 is-shara uıymdastyrdy. Onyń kópshiligi onlaın formatta ótedi.
Pavlodarda bas shyrsha shamyn 24 jeltoqsan kúni tikeleı efırde jaqty. Karantınge baılanysty saltanatty shara alǵash ret Ertis telearnasynyń efırinde ótti.
Kenshiler qalasy – Qaraǵandyda jańa jyldyq bas shyrshanyń shamdaryn jaǵý saltanaty 25 jeltoqsan kúni onlaın formatta ótti.
Dál osy kúni Kókshetaýdaǵy Abylaı han alańynda jańa jyldyq bas shyrshanyń shamdary jaǵyldy. Bas shyrshanyń bıiktigi – 22 metr, «Dostar» mádenıet úıi alańyndaǵy shyrshanyń bıiktigi 18 metrden kem emes.
26 jeltoqsanda Túrkistanda ákimshilik-iskerlik ortalyqtaǵy shyrshanyń shamyn qala ákiminiń orynbasary Merlan Kerimjanov jaqty. Oblys ortalyǵynda erterekte qala turǵyndary arasynda júrgizilgen saýalnama qorytyndysyna sáıkes, ótken jylǵy shyrshalar ornatylyp, bezendirý jumysy júrgizilgen bolatyn.
26 qańtarda Shymkentte jańajyldyq shyrsha shamy jaǵyldy. Bıyl pandemııaǵa baılanysty merekelik sharaǵa sanaýly bala ata-anasymen qatysty.
Ákimshilik-iskerlik alańyndaǵy jasandy shyrshanyń bıiktigi 25 metr. Ony bezendirýge jalpy uzyndyǵy 1200 metr qylqan japyraq, 110 jaryq shamy men 760 altyn shar, 800 metr jyltyraq jumsalǵan.
29 jeltoqsan kúni saǵat 18:00-de Óskemendegi Respýblıka alańynda bas shyrshanyń shamy jarqyrady.
Qala basshysy Jaqsylyq Omardyń aıtýynsha, búginde Qazaqstan kóshesi, Jeńis dańǵyly, Komendantka ózeni, Ýshanov alańy, Metallýrgter mádenıet saraıynyń aldyndaǵy skver, Arbat pen Respýblıka alańy merekege oraı bezendirildi.
