Qazaqstandaǵy Izraıl elshiligi narazylyq bildirip, jumystaryn toqtatty
ASTANA. QazAqparat - Izraıldiń Syrtqy ister mınıstrligi jarııalaǵan ereýilge oraı Qazaqstandaǵy Izraıl Elshiligi jumysyn toqtatty.
Atalmysh eldiń dıplomatııalyq korpýsynyń habarlamasynda aıtylǵandaı, Izraıldiń Syrtqy ister mınıstrligi qyzmetkerleriniń kásipodaq uıymy narazylyqty vedomstvodaǵy eńbek jaǵdaıyn jaqsartý úshin uıymdastyryp otyr.
Jumyskerlerdiń narazylyq sharalary 2014 jyldyń 5 naýryzynda bastalǵan. Endi Izraıl Elshiligi ereýil kezeńinde Qazaqstanǵa Izraıl delegattarynyń, Izraılge qazaqstandyq delegattardyń resmı saparlaryn uıymdastyrýǵa jáne ótkizýge, vızalardy rásimdeýge, azamattarǵa keńes berýge, oqytý jáne daıyndyqtan ótkizý sabaqtaryn ótkizýge, mádenı sharalardy ótkizýge jáne BAQ-pen suhbattasýǵa qatyspaıtyn bolady. Narazylyq sharasynyń aıaqtalý merzimi áli belgisiz. Qyzmetkerlerdiń ereýili týraly aqparat Elshiliktiń saıtynda jarııalanyp turmaq.
