«Qazaqstandaǵy ıslam» atty jýrnaldyń alǵashqy nómiri jaryq kórdi
ASTANA. Qazannyń 18-i. QazAqparat /Rýslan Ǵabbasov/ - Búgin Astanadaǵy Ulttyq Akademııalyq kitaphanada ótken «Islam mádenıeti men bilimin qoldaý qorynyń» Qamqorlar keńesinde «Qazaqstandaǵy ıslam» atty jýrnaldyń alǵashqy nómiri tanystyryldy.
«Basylym úsh aıda bir ret basylyp otyrady. Qazirgi kezde jýrnal qazaq jáne orys tilderinde 2,5 myń danamen jaryq kóredi. Keıinnen osy nusqasy aǵylshyn, arab tilderine aýdarylady»,- dedi atalǵan jýrnaldyń Bas redaktory Murat Almasbek.
Bas redaktordyń sózine qaraǵanda, Qazaqstannyń aldaǵy jyly Islam konferentsııasy uıymyna tóraǵalyq etýi qarsańynda bul jýrnal elimizdegi dinı ahýaldan túrli aqparat berý maqsatynda shyǵarylyp otyr. Bul mádenı-tanymdyq basylymda qoǵam, mádenıet qaıratkerleriniń, dintanýshylardyń, sondaı-aq basqa da zııaly qaýym ókilderiniń maqalalary jáne dinniń tarıhy men ózge ózekti máseleler turǵysynda saraptamalyq maqalalar jarııalanady.
Basylym turaqty aıdarlarmen jumysy isteıdi. Atap aıtsaq, Qazaqstan jerindegi ıslam dini tarıhynan habar beretin «Islam tarıhy», elimizdegi musylman memleketteriniń elshilerimen bolǵan suhbattardy jarııalaıtyn «Eldestirmek - elshiden», ıslam dini men qazaq halqynyń tarıhı rýhanı baılanysy týraly oı túıetin «Rýhanı tamyr», elimizge endi-endi dendep enip jatqan ıslam qarjy salasynan habar beretin «Islam qarjysy» syndy aıdarlardy qamtıdy.
Sonymen qatar jýrnal elimiz tarıhyndaǵy dinı ǵulamalar men qaıratkerler, qundy jádigerler jaıly tanymdyq aqparattar berip, elimizdiń abyroıyn kóteretin jaǵymdy jańalyqtardy qamtýdy kózdeıdi.
