Qazaqstandaǵy ishki týrızmge koronavırýs qalaı áser etti
Osy oraıda Qazaqstannyń ishki týrızmine karantın qalaı áser etti, onyń turaqty ósýin qamtamasyz etý jolynda qandaı sharalar júzege asyrylyp jatyr? Osy jáne ózge de suraqtarǵa jaýap alý maqsatynda QazAqparat tilshisi «Kazakh Tourism» ulttyq kompanııasyna saýal joldaǵan bolatyn.
«Álemdegi jáne eldegi pandemııa saldarynan qazaqstandyqtardyń bıylǵy jylǵa josparlaǵan demalys maýsymy aıtýly ózgeristerge ushyraǵany belgili. Osy oraıda otandastarymyz ishki týrıstik baǵyttardy tańdaýda, alaıda eldegi karantınge baılanysty týrıstik suranys tolyǵymen júzege asyrylmaı otyr. Sol sebepti ishki týrızm kórsetkishiniń ósýi ekitalaı. Boljam boıynsha, bıyl ishki týrıstik aǵyn ótken jylmen salystyrǵanda 70-80%-ǵa azaıady. Al jalpy alǵanda keıingi jyldary ishki týrızm kórsetkishi qarqyndy damyp kelgenin eskergen jón. Mysaly, 2019 jyly 6,6 mln ishki týrıst boldy, ol degenimiz 2018 jylmen salystyrǵanda 13%-ǵa artyq», - delingen aqparatta.
Sondaı-aq, resmı málimette otandyq týrıster demalý úshin kóbinese elimizdiń qaı óńirin taıdaıtyny aıtylǵan.
«Osy jazǵy maýsymda otandyq týrısterdiń nazarynda Mańǵystaý, Býrabaı, Alakól kýrorttyq aımaqtary boldy. Sonymen qatar, jańadan ashylǵan týrıstik oryndar joǵary suranysqa ıe. Onyń ishinde, elorda irgesindegi Kóbeıtuz kóli jáne oǵan teńdes Pavlodar oblysyndaǵy Korıakovka kóli. Odan bólek, Aqmola oblysyndaǵy Bestóbe shatqaly men Sileti sý qoımasy jáne Almaty oblysyndaǵy Tekes sarqyramasy», - dep habarlaıdy vedomstvodan.
Odan bólek, ulttyq kompanııa karantın rejimi ishki týrızmge qansha shyǵyn ákelgenine qatysty málimettermen bólisti.
«Eń aldymen, karantın talaptary trenıng, konferentsııalar, banketterdiń ótýine, sondaı-aq qonaqúılerdegi SPA men basseınderge áser etti. Mundaı qyzmetterge suranys joǵary boldy. Bul qyzmetter kýrorttar men qonaqúılerdiń, ásirese, elorda jáne Almaty qalasynan túsetin kiristerdiń 30%-yn quraıdy dep aıtýǵa bolady. QR Ulttyq ekonomıka mınıstrligi Statıstıka komıtetiniń málimetinshe, 2019 jyly týrıstik kompanııalar men kýrorttyq aımaqtar usynatyn qyzmetter kólemi shamamen 300 mlrd teńgeni (shamamen 730 mln AQSh doll) qurady. Osy málimetterge súıene otyryp, sonymen qatar qyzmetterdiń basym bóligi jazǵy maýsymda kórsetiletinin eskere otyryp, tolyq irkilis merziminde Qazaqstannyń týrıstik ındýstrııasy kúnine shamamen 1 mlrd teńgeni joǵaltady dep boljaýǵa bolady», - delingen saýal jaýabynda.
Ulttyq kompanııanyń sońǵy ýaqytta jıi oryn alyp jatqan týrısterdiń demalys oryndaryn lastaýǵa qatysty ustanymyn bildik.
«Týrızmde, kez-kelgen bıznestegideı, naryqtyq mehanızmder jumys isteıdi. Suranys bolsa, áleýmettik jelilerde belsendi jarnama júrgizilse, osyndaı biregeı oryndarǵa týrıstik aǵyn óse bastaıdy. Alaıda, bul baqylaýsyz aǵyn tabıǵı nysannyń ekojúıesine keri áserin tıgizedi. Sol sebepti elimizde biregeı nysandar qorǵaýǵa alynady. Qazaqstan aýmaǵynda týrısterdi qyzyqtyratyn oryn kóp, alaıda memlekettik organdarda barlyq terrıtorııalardy baqylaýǵa jetkilikti resýrsy joq. Sondyqtan biz týrıstik resýrstardy uqypty paıdalanýǵa shaqyramyz jáne jaqyn arada osy másele boıynsha áleýmettik jelilerde belsendi jumysty bastaımyz», - delingen málimette.
