Qazaqstandaǵy iri strategııalyq nysandardyń bárin memlekettik kúzet qyzmetine berý kerek - senator S. Eńsegenov
ASTANA. Jeltoqsannyń 8-i. QazAqparat /Qanat Mámetqazyuly/ - Qazaqstandaǵy iri strategııalyq nysandardyń barlyǵyn memlekettik kúzet qyzmetine berý kerek. Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda senator Sársenbaı Eńsegenov osylaı málim etti,
dep habarlaıdy QazAqparat.
«Qazirgi kúni Qazaqstanda iri ınvestıtsııalyq jobalar júzege asýda. Ásirese, sonyń ishinde Kaspıı teńizi óńirinde úlken kenderdi ıgerip, ekonomıkanyń damýyna qomaqty úles qosyp jatqan iri kompanııalar da barshylyq. Sondaı kásiporyndardyń qaramaǵynda 10 myńdaǵan jumysshy eńbek etedi. 2005-2007 jyldary osy aımaqtaǵy Teńiz kenishinde qazaq jumysshylary men sheteldikter arasynda úlken janjal oryn alǵany barshamyzǵa belgili. Bunyń sebepterin taldaý barysynda osyndaı mańyzdy, úlken, strategııalyq nysandardy kúzetý jekemenshik kúzet fırmalaryna berilgeni, olardyń qaýipsizdik máselesine jete nazar aýdarmaǵany baıqaldy. Al Іshki ister mınıstrligine qarasty memlekettik kúzet qyzmeti bundaı strategııalyq nysanǵa qatystyrylmaı qalǵan», dedi senator.
Onyń aıtýynsha, bundaı aýqymdy strategııalyq nysandar negizinen memlekettik kúzet qyzmetimen qamtylýy tıis. Senatordyń sózine qaraǵanda, dál osyndaı Úkimet qaýlysy bolǵanymen de, atqarýshy bıliktiń taǵy bir qaýlysy buǵan qarama qaıshy kelip tur. «Úkimettiń ekinshi qaýlysynda osyndaı strategııalyq nysandardy jeke kúzet qyzmetine berse de bolady dep kórsetilgen. Normatıvtik quqyqtyq aktilerdegi bundaı qaıshylyq jappaı tártipsizdikke jol berip qoıǵany bir ret emes, al sol týraly birneshe márte másele kóterilgenimen de, tıisti shara qabyldanbaı keledi», dedi S. Eńsegenov.
