Qazaqstandaǵy iri etnostardyń tarıhy zerdelengen monografııa jaryq kórdi
ASTANA. QazAqparat - Búgin elordada «Qazaqstan Respýblıkasyndaǵy etnosaralyq jáne konfessııaaralyq qatynastarynyń tarıhy, sonyń ishinde Qazaqstan etnostarynyń tarıhy» ǵylymı jobasynyń tanystyrylymy ótti, dep habarlaıdy QazAqparat.
«Bul jumystyń nátıjesinde bizde birneshe aıaqtalǵan monografııalyq eńbekke qol jetkizdik deýimizge bolady. Onyń ishindegi negizgi jumys Qazaqstan Respýblıkasyndaǵy etnosaralyq qarym-qatynastardy zerdeleý ádistemesine arnalyp otyr. Jalpy 17 kitap shyqty. Olardyń qatarynda «Qazaqstandaǵy ıslam pen pravoslavıe dininiń qarym-qatynasy» jáne Qazaqstandaǵy onnan astam etnostyq toptardyń tarıhyna arnalan arnaıy jeke-jeke kitaptar daıyndaldy. Onyń ishinde orystar, nemister, kárister, polıaktar, dúngender, ózbekter, qyrǵyzdar bar», - dedi joba jetekshisi, QR Memlekettik qyzmet akademııasy Etnosaralyq jáne konfessııaaralyq qatynastardy zertteý ortalyǵynyń basshysy Aıgúl Sádýaqasova.
Qazaqstandaǵy etnosaralyq, konfesssııaaralyq qatynastar tarıhyn, elimizdiń asa iri etnostarynyń tarıhyn, mádenıeti men dástúrlerin zerdeleýdi maqsat etken jobany QR Prezıdenti janyndaǵy Memlekettik basqarý akademııasy «Halyq tarıh tolqynynda» memlekettik baǵdarlamasy aıasynda júzege asyrǵan. Ony iske asyrýǵa QHA ǵylymı-sarapshylyq keńesiniń músheleri, sarapshylar qatysty. Olardyń ishinde áleýmettaný, tarıh, fılosofııa jáne saıasattaný ǵylymdarynyń 8 doktory, 9 kandıdat jáne 5 magıstri boldy.
Joba aıasynda Qazaqstannyń óńirlerinde áleýmettik, etnologııalyq, dalalyq zertteýler júrgizilip, elimizdegi asa iri etnostardyń tarıhyna qatysty qazaq jáne orys tilderinde monografııa jaryq kórdi. Osylaısha, alǵash ret orystar, qyrǵyzdar, nemister, polıaktar, kárister, ózbekter, uıǵyrlar, dúngender, tatarlar, belarýstar, sheshender men ıngýshtar jaıynda tarıhı-etnografııalyq málimetter júıelendi, dástúrler, salt, din sonymen qatar iri etnos ókilderiniń ǵylym men bilim, ádebıet pen óner salasyndaǵy jetistikteri boıynsha materıal jınaqtaldy.
Zertteý qorytyndysy boıynsha jınaqtalǵan materıaldardy memlekettik organdardyń, qoǵamdyq uıymdardyń, bilim berý jáne tárbıe uıymdarynyń jumysynda qoldaný boıynsha usynys ázirlendi.
