Qazaqstandaǵy iri eldi mekenderdiń ınfraqurylymdaryn tsıfrlandyrý 2024 jyly aıaqtalady

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi ákimdiktermen birlesip óńirlerdiń ınjenerlik ınfraqurylymy týraly derekterdi tsıfrlandyrý jáne toltyrý boıynsha jumys júrgizýde.

Bul is-shara «Tsıfrlandyrý, ǵylym jáne ınnovatsııalar esebinen tehnologııalyq serpilis» Ulttyq jobasy sheńberinde iske asyrylýda, dep habarlaıdy QazAqparat QR Indýsrııa jáne ınfraqurylymdyq damý mınıstrliginiń baspasóz qyzmetine silteme jasap.

Atap aıtqanda, 2024 jylǵa deıin elimizdegi iri eldi mekenderdiń ınjenerlik ınfraqurylymyn tolyqqandy tsıfrlandyrý josparlanyp otyr. Bıyl Aqtóbe, Qaraǵandy, Óskemen, Lısakov (Qostanaı oblysy) jáne Arys (Túrkistan oblysy) qalalaryndaǵy qurylys júrgizilgen 9,3 myń ga aýmaqqa ınjenerlik nysandardy túgendeý jumystary júrgizilýde. 2022 jyldyń alǵashqy jartyjyldyǵynyń qorytyndysy boıynsha atalǵan óńirlerdegi 3,8 myń ga aýmaqtaǵy ınjenerlik kommýnıkatsııalar túgendelgen.

Jergilikti bıýdjet qarajaty esebinen eldi mekenderdiń 10,7 myń ga aýmaǵynda jerasty jáne jerústi kommýnıkatsııalaryn túgendeý júrgizilýde.

Injenerlik kommýnıkatsııalardyń tsıfrlyq derekteri qala qurylysy kadastrynyń avtomattandyrylǵan aqparattyq júıesine engiziledi. Bul respýblıkanyń búkil aýmaǵynda qajetti aqparatty jınaýdy, óńdeýdi, saqtaýdy jáne usynýdy biryńǵaı esepke alýdy qamtamasyz etedi.

Búginde qala qurylysy kadastrynyń derekter qory ınjenerlik kommýnıkatsııalar derekteriniń 63,7 paıyzyn (328 myń ga) qamtıdy. Infraqurylymdyq derektermen jumys isteý úshin jergilikti atqarýshy organdar men tabıǵı monopolııalar sýbektileri úshin Biryńǵaı ınfraqurylymdyq derekter geoportaly ashyq bolady.