Qazaqstandaǵy ınjener-qurylysshylardyń kásibı biliktiligi men bilimi óte joǵary - Germanııa ǵalymy
ASTANA. QazAqparat - Qazaqstandaǵy ınjener-qurylysshylardyń kásibı biliktiligi men bilimi óte joǵary. Bundaı pikirdi búgin elordada ótip jatqan Injener-geotehnıterdiń Azııalyq jastar konferentsııasy aıasynda «QazAqparatqa» Germanııanyń geotenıkalyq qoǵamynyń prezıdenti, doktor Volfgang Zondermann aıtty.
«Qazaqstandaǵy mamandardyń kásibı biliktiligi joǵary ekenin aıtqym keledi. Qazaqstanda ınjenerlerdiń bilim deńgeıi ózge de damyǵan elderdiń mamandarynan qalys kele jatqan joq. Alaıda, saladaǵy ádister, standarttar men tehnıka únemi ózgeriske ushyrap, damyp otyrady. Bul úrdis tek Qazaqstanda ǵana emes, sonymen qatar barsha álemde júrip jatqany belgili. Sondyqtan da, jańa talaptarǵa saı bolýy turǵysynda geotehnıkter únemi bilimin shyńdap, ózderin jetildirýi tıis. Jahandaný úderisi bul salany da qamtyp otyrǵandyqtan, jańa sheshimderdi eńserýge barshamyz daıyn bolýymyz qajet»,-dep toqtaldy ǵalym.
Sonymen qatar, Volfgang Zondermann Astanaǵa alǵash kelgenin jáne Qazaqstan elordasynyń kelbeti oń áser qaldyryp otyrǵandyǵyn atap ótti. Qalada qurylys qarqyndy júrip jatqandyqtan, ınjener retinde oǵan shahardaǵy nysandar qalaı salynǵandyǵy jáne bolashaqta qurylysy júrgiziletin aýqymdy jobalar qyzyǵýshylyq týdyryp otyrǵandyǵyn sóz etti.
Aıta keteıik, konferentsııa maqsaty - barsha Azııa óńiriniń jas ınjener-geotehnıkterine ınteraktıvti tuǵyrnamany usyný, saladaǵy ınnovatsııalar boıynsha tájirıbe almasý, sondaı-aq qurylys, bilim jáne ǵylymda yntymaqtastyqtyń perspektıvaly joldaryn aıqyndaý. Ǵalymdardyń bul konferentsııasy L.N. Gýmılev atyndaǵy Eýrazııa ulttyq ýnıversıtetinde jáne Nazarbaev Ýnıversıtetinde 3-7 tamyz aralyǵynda ótedi.
Konferentsııa jumysyna 18 elden 100-ge jýyq mamandar men ǵalymdar qatysyp jatyr.
