Qazaqstandaǵy ınflıatsııa deńgeıi báseńdeý sıpatyna ıe - Ulttyq bank

ASTANA. QazAqparat - Qazaqstandaǵy ınflıatsııa deńgeıi báseńdeý sıpatyna ıe. Bul týraly búgin «2016-2018 jyldarǵa arnalǵan respýblıkalyq bıýdjet týraly» zańyna ózgerister men tolyqtyrýlar engizý týraly» zań jobasynyń tanystyrylymy barysynda QR Ulttyq banki tóraǵasynyń mindetin atqarýshy Oleg Smolıakov málim etti.

UB ókiliniń aıtýynsha, bıylǵy jylǵy basty mindet - ınflıatsııa deńgeıin turaqtandyrý jáne 6-8 paıyzdyq dálizge qaıtarý.
«Qańtar aıynyń qorytyndysyna sáıkes, jyldyq kórinistegi ınflıatsııa 14,4 paıyzdy qurady. Eń aldymen, bul dáliz ınflıatsııa boıynsha boljamǵa negizdelmeıdi, alaıda Ulttyq banktiń aqsha kredıttik saıasatynyń nysanaly baǵdary retinde aıqyndalady.
Degenmen, osy baǵyttaǵy kórsetkishke qol jetkizý úshin syrtqy ekonomıkalyq jaǵdaılar birqatar táýekelder týdyrýy múmkin.
Alaıda, meniń oıymsha, qolda bar quraldar arqasynda biz nysanaly parametrge qol jetkize alamyz», dedi Oleg Smolıakov.
Onyń aıtýynsha, 2015 jyldyń qazan aıynda ınflıatsııa deńgeıi aılyq kórsetkishte 5,2 paıyz bolsa, byltyrǵy jeltoqsan aıy men 2016 jyldyń qańtarynda ınflıatsııa deńgeıi 1,2-1,3 paıyz deńgeıinde turaqtaldy. 2016 jyldyń aqpan aıynyń birinshi aptasynda áleýmettik mańyzdy taýarlar baǵasy 0,9 paıyzǵa ósti, al ekinshi aptasynda bul 0,1 paıyz ǵana boldy.
«Qazaqstanda ınflıatsııa báseńdeý sıpatyna ıe. Barshańyzǵa belgili ádette jyl basynda ınflıatsııa joǵary bolyp, sosyn tómendeıdi. Sosyn bekitilgen dálizge senim arttyratyn taǵy bir faktor bizdiń saýdalyq áriptes elderimizde, sonyń ishinde Reseıde de ınflıatsııa deńgeıi turaqtala bastady», - dedi O.Smolıak. Onyń aıtýynsha, 2020 jylǵa qaraı ınflıatsııany 4 paıyzǵa deıin tómendetý kózdeledi.