Qazaqstandaǵy halyqtyń 30 paıyzy shylym shegedi
NUR-SULTAN. QazAqparat - Qazaqstan restoratorlary áýejaılar men vokzaldarda, demalý oryndarynda shylym shegýge arnalǵan arnaıy oryndardy alyp tastaý máselesine qatysty pikir bildirdi, dep habarlaıdy QazAqparat tilshisi.
Restoratorlardyń habarlaýynsha, qazirgi ýaqytta elimizde «Ult densaýlyǵy týraly» kodekske engiziletin ózgerister qaralýda. Qaýymdastyq osy kodekste bir top azamattardyń quqyǵyn shekteıtin, ShOB-tyń isin qıyndatatyn birqatar sharalar baryn alǵa tartady.
«Reseıde osydan birneshe jyl buryn qoǵamdyq oryndar men áýejaılarda jappaı shylym shegýge tyıym salynǵan edi. Munyń bári máseleni sheshken joq. Aqyry, ondaǵy Memlekettik dýma depýtattary men qoǵamdyq uıymdar Reseıde engizilgen osy ózgeristerdi alyp tastaý máselesin qaıta qarastyryp jatyr. Bizdiń qaýymdastyqtyń shylym shegý úshin arnaıy oryn bólýge tyıym salý máselesine qatysty naqty qaǵıdaty bar - bul ózgerister Qazaqstandaǵy shylym shegýshilerdiń quqyǵyn buzyp otyr», - deıdi Qazaqstan restoratorlary ulttyq qaýymdastyǵynyń prezıdenti Igor Kopaılov elordada ótken baspasóz máslıhatynda.
Igor Kopaılovtyń aıtýyna qaraǵanda, Qazaqstandaǵy halyqtyń 30 paıyzy temeki shegedi.
«Ózim temeki shekpeımin de, janymda bireý shegip tursa - unatpaımyn. Dese de, azamattardyń osy sanatynyń quqyǵy men qajettiligin qurmetteý kerek. Osyǵan baılanysty 2014 jyly «Ult densaýlyǵy týraly» zańǵa ózgerister engizý bastamasyn kótergen bolatynbyz. Ol zań arnaıy shylym shegýge arnalǵan oryn, demalý oryndarynda arnaıy shylym shegý kabınalaryn ornatý máselesin retteıdi. Zań sátti qabyldanyp, Parlament músheleri maquldap, arnaıy kabınalardyń bolýy - báriniń de quqyǵyna qaıshy kelmeıtinin aıtqan bolatyn. Osymen másele sheshilgendeı bolǵan edi», - deıdi ol.
Qaýymdastyq basshysy qazirgi ýaqytta qoǵamda osy másele qaıta kóterilip otyrǵanyn aıtady.
«Oılap qarańyz, qysta 40 gradýs sýyqta keńsede qyzmet etetin qyzmetshi qaıta-qaıta syrtqa shyǵyp, shylym shegýi kerek pe? Al álgi qyzmetshi 40-shy qabatta jumys istese qaıtemiz - ol sát saıyn tómenge túsýi tıis pe? Olaı bolsa, álgi azamattyń densaýlyǵyna da aqaý kelýi múmkin. Sol sebepti, bul shara bizge óte túsiniksiz», - deıdi Igor Kopaılov.
