Qazaqstandaǵy halyq sany 17 mln. 400 myń adamǵa jetti
ASTANA. QazAqparat - 2013 jylǵy 1 jeltoqsanymen salystyrǵanda halyq sany 251 myń adamǵa ósti. Bul týraly búgin Ortalyq kommýnıkatsııalar qyzmetinde 2014 jylda Qazaqstannyń áleýmettik-ekonomıkalyq damýynyń statıstıkalyq qorytyndylaryna arnalǵan brıfıngte QR Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov málim etti.
«Ótken jylǵy 1 jeltoqsandaǵy jaǵdaı boıynsha elimizdegi halyq sany 17 mln. 397 myń adamdy qurady. 2013 jylǵy 1 jeltoqsanymen salystyrǵanda halyq sany 251 myń adamǵa nemese 1,5 paıyzǵa ósti», - dedi Á. Smaıylov.
Onyń sózine qaraǵanda, týylǵandar sany 368 myńǵa jetip, 1,6 paıyzǵa artty. Al qaıtys bolǵandar 120 myń adamdy qurap, 4,7 paıyzǵa tómendedi.
«Qańtar-qarashada elimizge turǵylyqty turýǵa kelgenderdiń tirkelý sany 15 185 adamdy qurady. Al elden ketkenderdiń sany 18,8 paıyzǵa kóbeıip, 26 869 adamdy qurady»,-dedi Á. Smaıylov.
Atap aıtqanda, elimizdegi negizgi kóshi-qon burynǵydaı TMD elderi aıasynda saqtalyp otyr.
