Qazaqstandaǵy Frantsııa elshiliginde gúl shoqtary qoıylyp, shyraq jaǵyldy
ASTANA. QazAqparat - Qazaqstandyqtar terrorlyq oqıǵaǵa baılanysty Frantsııa halqyna kóńil aıtyp, qaıǵylarymen ortaqtasýda. Frantsýz halqynyń qaıǵysyna ortaqtasyp, oqıǵaǵa beıjaı qaraı almaǵan qazaqstandyqtar Astanada QR-daǵy Frantsııa Elshiligi men Almatydaǵy Frantsııa Bas konsýldyǵynyń ǵımaraty aldyna gúl shoqtaryn qaldyryp jatyr.
Sonymen qatar, bul qandy oqıǵany áleýmettik jelilerde de qyzý aıyptap, kóńil aıtyp jatyr.
«Sumdyq oqıǵa. Qaza tapqandardyń otbasylary men jaqyn, týystaryna qaıǵyryp kóńil aıtamyn. Osydan bir apta buryn ǵana sapar kezinde ol jaqta bolyp edim. Beıbit orta, kóptegen alańsyz týrıster men balalardy kórip edim», - dep jazdy QR Investıtsııalar jáne damý mınıstri Áset Isekeshov Facebook áleýmettik jelisindegi jeke paraqshasynda.
«Parıj halqy, sendermen birge egilip otyrmyn...», - dep jazba qaldyrǵan «Qazaqstan Barysynyń» negizin qalaýshy Arman Shýraev.
«Terrorlyq áreket Frantsııanyń álemdegi erkindik pen demokratııa bastaýlarynyń biri bolǵan senimdiligine áser etpeıtinine jáne terrorlyqpen kúreste belsendi bola túsetinine senemin. Frantsııa, bekem bol! Biz senimen birgemiz!», - deıdi kelesi Internet qoldanýshy Aýyl sharýashylyq eks-vıtse-mınıstri, «Smart Investments» JShS dırektory Marat Tólibaev
Frantsııa halqynyń qaıǵysyna ortaqtasyp, áleýmettik jelini paıdalanýshy qazaqstandyqtar Frantsııa týynyń belgisin óz sýret belgisine ornatyp, qaıǵyǵa ortaqtasqanyn bildirip otyr.
Eske sala keteıik, búgin QR Prezıdenti Nursultan Nazarbaev qasiret qurbandarynyń týǵan-týystary men jaqyndaryna, sondaı-aq barsha Frantsııa halqyna jeke óziniń jáne Qazaqstan halqynyń atynan kóńil aıtty.
Jedelhatta Parıj qalasynda jasalǵan jantúrshigerlik áreketter saldarynan kóp adamnyń qaza bolǵany týraly sýyt habardy Memleket basshysy zor kúızelispen qabyldaǵany aıtylǵan.
«Qazirgi tańda terrorızmniń etek alýy barlyq memleketter úshin ortaq qaýip-qaterge aınalyp otyr. Qazaqstan halyqaralyq qaýipsizdikke qater tóndiretin lańkestik pen ekstremızmniń kez kelgen túrin aıyptaıdy», - delingen jedelhatta.
