Qazaqstandaǵy et baǵasy Keden odaǵyndaǵy ózge elderdiń baǵasymen teńesedi - Berik Beısenǵalıev
MATY. 14 qazan. QazAqparat /Erlik Erjanuly/ - Búgingi kúnde Qazaqstan qoı men sıyr etin óndirýde ózi tutynatyn ónimdi tolyq shyǵaryp otyr.
Ony "QazAgro" ulttyq basqarýshy holdıngi" AQ-nyń basqarma tóraǵasy Berik Beısenǵalıev búgin Almatyda QazAgro" Qazaqstan-Túrkııa isker adamdar qoǵamy ókilderimen bolǵan kezdesýde aıtty.
"Qazir dúnıejúzine et eksporttaýshy Argentına, Brazılııa sııaqty elder óz áleýetiniń eń joǵarǵy sheginde tur. Olar ony budan ári qaraı ulǵaıtýǵa múmkindigi joq. Al suranys artpasa, kemimeıdi. Qazaqstanda 180 mıllıon gektar jaıylym bar, 25 mıllıon gektar sýarmaly jer bar. Ony 50 mıllıonǵa deıin kóbeıtýge bolady. Sondyqtan baǵanyń kóterilýinen qorqýdyń esh jóni joq. Baǵa ózge elderden tómen bolsa, bizdiń elimizde óndirilgen ettiń bári syrtqa ketetin bolady", - deıdi B.Beısenǵalıev. Qazirgi kúni Qazaqstan 800 myń tonna et óndiredi. Onyń 400 myńy iri qara maldyń, 120 myńy - qoıdyń eti.
Berik Tursynbekulynyń aıtýynsha, iri qara men qoıdyń eti Qazaqstanda qajetti deńgeıde óndirilgenimen Keden odaǵy aýmaǵynda shekara ashyq bolǵandyqtan, baǵa joǵary bolǵan soń, Reseıge shyǵarylýda. Sol sebepti ishki naryqtaǵy baǵa da kóterilýde. Onyń jaqsy jaǵy da, jaman jaǵy da bar. Jalpy ishki naryqta et baǵasynyń ósýi tutynýshy úshin qolaısyz bolǵanymen, óndirýshiler úshin qolaıly. Ol mal sharýashylyǵy salasynda jumys jasaıtyndarǵa jańa múmkindikter ashýda. Rentabeldiligi tómen bolǵandyqtan buryn ony qarjylandyrýdy damytýǵa ynta bolǵan joq edi. Bıyl "QazAgro" holdınginen nesıe alýǵa kezekti turǵandar sany kúrt kóbeıip otyr.
