Qazaqstandaǵy eski qoǵamdyq kólikterdiń ornyn ekologııalyq taza avtobýstar basady

ASTANA. QazAqparat - Qazaqstanda ekologııalyq taza qoǵamdyq kólikter kóbeıedi, dep habarlaıdy QazAqparat tilshisi.

Bul týraly «Allur Group» avtomobıl kompanııalary tobynyń prezıdenti Andreı Lavrentev «Nur Otan» partııasynyń kezekti XVIII sezinde aıtty.

«Ótken jyly bizdiń zaýyt Aqtaý, Aqtóbe, Atyraý qalalary úshin elektr jáne gazben júretin avtobýstar shyǵardy. Bıyl myń jarymnan astam jańa ekologııalyq avtobýstar Shymkent, Pavlodar, Taldyqorǵan qalalary úshin shyǵarylady. Astana men Almaty qalalarynda JAC elektr kólikteri júr. Birneshe jylda 16 myń eski avtobýs jańartylady.

Sondaı-aq, A. Lavrentev elimizde agrarlyq sektordy damytatyn múmkindikter zor ekenin, sondyqtan, óz aýyl sharýashylyǵy tehnıkamyzdy shyǵarý kerektigin sóz etti.

«Elimizdegi aýyl sharýashylyǵy tehnıkalarynyń teń jartysy - bizdiń kásiporynǵa tıesili. Bul jyldary 4,5 myń kombaın shyǵardyq, olardyń jalpy quny 200 mln dollardan asady. Bıyl tanymal Peterbýrg traktor zaýytymen birlesip, Kırovets traktorlaryn shyǵarýdy bastaımyz», - dedi A. Lavrentev.

Spıker azamattardyń ómir sapasyn jaqsartý, ınklıýzıvti ekonomıka bastamasyn damytý, baqýattylyqtyń ósýi, árbir jekelegen azamat sezinetindeı ekonomıka qurýǵa atsalysatynyn jetkizdi.

«Bizdiń zaýytta myń jarymǵa jýyq adam jumys isteıdi. Bıyl olardyń eńbekaqysyn 30 paıyzǵa kóterip, áleýmettik paketti keńeıttik. Úsh jyl buryn dýaldy oqytý júıesin engizip, dánekerleýshi, boıaýshy mamandardy ózimiz daıarlap kelemiz», - dedi A. Lavrentev.