Qazaqstandaǵy epıdemıologııalyq jaǵdaı turaqty - N. Sádýaqasov
ASTANA. 5 tamyz. QazAqparat /Qanat Mámetqazyuly/ - Qazaqstandaǵy epıdemıologııalyq jaǵdaı turaqty. Bul týraly búgin elimizdegi epıdemıologııalyq jaǵdaıǵa qatysty Densaýlyq saqtaý mınıstrliginde ótken baspasóz máslıhatynda Memlekettik sanıtarlyq-epıdemıologııalyq qadaǵalaý komıteti, Bas memlekettik sanıtarlyq dáriger mindetin atqarýshy Nurlan Sádýaqasov málim etti.
«Respýblıkamyzda aǵymdaǵy jyldyń 7 aıynda turǵyndardyń dıfterııa, juqpaly aýrýlarmen aýrýy boıynsha epıdemıologııalyq ahýaly turaqty jáne bıylǵy kórsetkishter ótken jylǵy kezeńderge qaraǵanda tómen bolyp otyr. Ótken 7 aı ishinde dıfterııa, polıomelıt, qylaý, trıhenellez sekildi jáne basqa da asa qaýipti juqpaly, parazıtarlyq aýrýlardyń jaǵdaıy tirkelgen joq. Jergilikti jerlerde atqarylǵan sharalardyń arqasynda birqatar ınfektsııalar boıynsha aýrý kórsetkishteri tómendedi», - dedi N. Sádýaqasov.
Keltirilgen málimetterge, qaraǵanda, bıyl byltyrǵy jylmen salystyrǵanda 18 ınfektsııa túrleri boıynsha aýrý kórsetkishteri azaıǵan. Onyń ishinde botýlızmge shaldyǵý 4,3 esege, Kongo-Qyrym qandy bezgegi 2,7 ese, salmonellez 35,6 paıyzǵa, «A» vırýsty gepatıti 31,1 paıyzǵa, «V» vırýsty gepatıti 26,5 paıyzǵa, bakterııalyq dızenterııa 15 paıyzǵa, ótkir ishek ınfektsııalary 13,1 paıyzǵa, tynys alý organdary týberkýlezi 11,7 paıyzǵa tómendegen. Bul rette qandy bezgek 10 oqıǵaǵa, lısterıoz 9 oqıǵaǵa, epıdemııalyq parotıt jáne sibir jarasy 3 oqıǵaǵa azaıǵan.
