Qazaqstandaǵy energııa tıimdiligin arttyrý jobasy aıasynda 100-ge jýyq áleýmettik nysan jańǵyrtylady
ASTANA. QazAqparat - Qazaqstandaǵy energııa tıimdiligin arttyrý jobasy aıasynda 100-ge jýyq áleýmettik nysan jańǵyrtylady Bul týraly QR Investıtsııalar jáne damý mınıstri Áset Isekeshev málim etti.
Onyń atap ótýinshe, Ulttyq energııa únemdeý jáne energııa tıimdiligin arttyrý salasyndaǵy damý ınstıtýty energııany únemdeýdegi memlekettik saıasatty júzege asyrý jumystaryn kezeń-kezeńimen júzege asyrýda. Máselen, Dúnıejúzilik bank granty aıasynda ınstıtýt Qazaqstan Úkimeti atynan «Qazaqstandaǵy energııa tıimdiligin arttyrý» jobasynyń atqarýshy agenti retinde aıqyndalǵan.
«Joba aıasynda búkil respýblıka boıynsha shamamen 100-ge jýyq áleýmettik nysandy jańǵyrtý josparlanyp otyr. 2015-2016 jyldardyń ózinde-aq 44 áleýmettik nysan (balabaqshalar, mektepter, aýrýhanalar men kóshelerdi jaryqtandyrý) iriktep alynǵan. Onyń 19-y boıynsha jobalyq-smetalyq qujaty ázirlenip, bıyl-aq qurylys-montaj jumystaryn qolǵa alý josparlanǵan», - dedi Á.Isekeshev.
Aıta keteıik, elordada «Bıýdjettik sektor men shaǵyn jáne orta bıznes kásiporyndarynda energııa únemdeý, energııa tıimdiligin arttyrý jobalaryna ınvestıtsııalar tartý» taqyrybynda dóńgelek úste otyrysy ótýde.
