Qazaqstandaǵy eńbek mıgranttaryn retteýge Reseıdegi júıe tıimdi - ІІM
ASTANA. 13 qarasha. QazAqparat - Qazaqstandaǵy eńbek mıgranttaryn retteýge Reseıdegi júıe tıimdi. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Іshki ister mınıstriniń orynbasary Qaırat Tynybekov málim etti.
«Elimizdegi eńbek mıgranttarynyń jumysyna qatysty jańa tetigi ázirlendi. Bul rette kóshi-qon jónindegi halyqarlyq uıymdardyń qoldaýymen sheteldik jumys kúshin tartýdyń álemdik tájirıbesi zerdelendi. Máselen, AQSh ulttyq ekonomıkasynda eńbek mıgranttary jumys kúshiniń ájeptáýir bóligin qamtamasyz etip otyr. Ol boıynsha eńbek mıgranttaryn tartý negizgi eki baǵytta júzege asady. Onyń biri eńbek mıgrantynyń mártebe alýy bolsa, ekinshisi ýaqytsha jumysker retinde bolý. Ekinshisiniń AQSh-ta bolý merzimi shekteýli. Bundaı mıgranttar sanatymen kelýshiler sany shekteýsiz, ıaǵnı olar maýsymdyq jumystarǵa, kýrorttyq qalalardaǵy qyzmet kórsetýlerge ornalasady», - deıdi Q. Tynybekov.
Onyń aıtýynsha, Frantsııanyń eńbek mıgranttaryn retteýge baǵyttalǵan zańnamasy qataldaý. Eńbek mıgranttaryn tartý barysynda Frantsııa jumys berýshisi sheteldikke usynylatyn jumys ornynyń frantsýz azamattaryn qyzyqtyrmaǵanyn dáleldeýi kerek. Bunymen qosa, keıbir mamandyqtarǵa asa jeńildetilgen vızalyq rejımi usynylady. Olarǵa ártister, sportshylar, mádenıet pen óner qaıratkerleri jatady. Eńbek resýrstarynyń esebin júrgizetin naqty júıe qalyptasqan. Ol boıynsha Frantsııaǵa tek frantsýz ekonomıkasyna qajetti mamandar ǵana kele alady. Quzyrly, talantty mamandyqtarǵa arnaıy kartalar rásimdeledi.
«Al Qazaqstanǵa Reseıde qoldanylatyn eńbek patentterin berý júıesi asa qolaıly bolyp tabylady. Reseıde jeke tulǵalarda jaldanatyn jumys kúshine eńbek patentteri beriledi. Ol sheteldikke eńbek mıgrantyna Reseı mıgratsııa qyzmetiniń aýmaqtyq bólimsheleri arqyly beriledi. Patent sheteldik jumysshy 1000 rýbl tólegeni týraly túbirtek kórsetkende ǵana beriledi. Bul 1 aıdan 3 aıǵa deıin jaramdy bolady, sosyn ony 1 jylǵa uzartýǵa jáne tólem jasaıdy», - deıdi Qaırat Tynybekov.
