Qazaqstandaǵy eńbek mıgratsııasyn basqarýda jańa ádister júzege asatyn bolady

Bul týraly búgin QR Parlamenti Májilisinde ótken Úkimet saǵatynda QR Eńbek jáne halyqty áleýmettik qorǵaý mınıstri Gúlshara Ábdihalyqova málim etti, dep habarlaıdy QazAqparat.

Mınıstrdiń aıtýynsha, búgingi kúni kóshi-qon zańnamasyn jetildirýdiń jańa strategııasy ázirlenip, qujat eldiń geosaıası múddelerin júzege asyrýǵa, áleýmettik damýǵa, ulttyq konsolıdatsııany, qaýipsizdik pen turaqtylyqty nyǵaıtýǵa baǵyttalady. «Bul rette jańa ádister eńbek mıgratsııasyn basqarýda da qoldanylatyn bolady. Birinshiden, eńbekshi-mıgranttardy qabyldaýdyń 3 sanaty kózdeledi. Atap aıtqanda, elde júrip-turý men eńbekpen qamtýdyń saralanǵan normalary qoldanylatyn sheteldik jumysshylar, maýsymdyq sheteldik jumysshylar jáne bıznes-mıgranttar dep belgileý qarastyrylady. Ekinshiden, qoldanystaǵy jalpy kvotamen qatar eldik jáne salalyq kvotalar, sondaı-aq basymdyqty jobalarǵa degen kvotalar belgilenetin bolady. Bul sharaǵa selektıvti saıasat júrgizýge jáne Úkimet basymdyqty retinde anyqtaǵan jekelegen salalardyń eńbek resýrstaryna degen qajettilikti qanaǵattandyrýǵa múmkindik beredi», dedi mınıstr. Onyń aıtýynsha, eńbekshi-mıgranttarǵa degen suranysty jergilikti kadrlar esebinen qanaǵattandyrý múmkin bolmaıtyn, joǵary bilikti mamandardy tartýǵa aıryqsha nazar aýdarylatyn bolady. Ondaı mamandardy jumysqa tartý týraly ruqsatnama Úkimet anyqtaıtyn tizim negizinde ǵana beriletin bolady.