Qazaqstandaǵy eńbek daýlarynyń 99 paıyzy Mańǵystaýǵa tıesili

NUR-SULTAN. QazAqparat – Qazaqstan boıynsha 53 kásiporynda eńbek daýy bar. QR Bas memlekettik eńbek ınspektory Tólegen Ospanqulov ortalyq kommýnıkatsııalar qyzmetinde ótken brıfıngide osyndaı málimet berdi, dep habarlaıdy QazAqparat tilshisi.

«Byltyr qurylǵan sıtýatsııalyq ortalyqtyń aıasynda kún saıyn Eńbek jáne halyqty áleýmettik qorǵaý mınıstrligi jergilikti ákimdiktermen birge eldegi kásiporyndardaǵy ahýal tekserilip otyrady. Bul ortalyqtyń málimetterine múddeli memlekettik organdardyń bári jalǵanǵan. Osy monıtorıngtiń deregi boıynsha, ortalyq qurylǵannan beri 500-den astam problemalyq kásiporyn tizimge engen. Memlekettik jáne jergilikti atqarý organdary qabyldaǵan sharalardyń arqasynda sol kásiporyndardyń 449-ynda másele sheshilgen. Olar qazir monıtorıngten alynyp tastaldy. Búgingi tańda monıtorıngte respýblıka boıynsha 53 kásiporyn bar. Olar boıynsha jergilikti ákimdikter tıisti shara qabyldap jatyr. Joǵaryda atalǵan 449 kásiporyn boıynsha tek keıingi 4 jylda 34 narazylyq aktsııasy ótken. ıAǵnı, úsh saǵattan astam ýaqytqa jumys toqtatylǵan. Eńbek kodeksi boıynsha bul úshin ákimshilik-tártiptik jaýapkershilik qarastyrylǵan», - dedi komıtet ókili.

Onyń sózine qaraǵanda, eńbek daýlarynyń 99 paıyzy - Mańǵystaý oblysyna tıesili.

«Óńirlerge jiktep aıtsaq, 34 narazylyq aktsııasynyń 33-i Mańǵystaý oblysynyń kásiporyndarynda bolǵan. Qalǵan bir aktsııa Atyraý oblysynda oryn aldy. 33 aktsııanyń ishinde 27-sinde qazir másele sheshilgen. ıAǵnı, ondaǵy kásiporyndar josparly rejımde jumys istep tur. Jumys berýshilermen ymyraǵa kelý sharalarynyń arqasynda jumysshylar qoıǵan talaptar oryndaldy. Búginde qazir 6 kásiporynda narazylyq aktsııasy jalǵasyp jatyr. Olar boıynsha ákimdikter Úkimet qaýlysy bekitken algorıtm aıasynda shara qabyldap jatyr», - dedi Tólegen Ospanqulov.

Buǵan deıin QR Premer-Mınıstriniń orynbasary Eraly Toǵjanov eńbek daýlaryn sheshý máselesinde Mańǵystaý oblysynyń tájirıbesin engizýdi usynǵan edi.