Qazaqstandaǵy eń uzyn alma bálishi Taldyqorǵanda pisirilmek
TALDYQORǴAN. QazAqparat - 1 qazanda Taldyqorǵanda qala kúni merekesi toılanady. Osyǵan oraı oblys ortalyǵynyń restoratorlar qaýymdastyǵy Qazaqstandaǵy eń uzyn alma bálishin pisirmek.
Taldyqorǵan qalasy ákiminiń baspasóz qyzmetinen habarlaǵandaı, bálishtiń uzyndyǵy 100 metrge jetedi. Eni 40 sm. Oǵan 450 keli alma, 390 keli un, 117 keli qant, 90 lıtr sút, 70 keli maı, 5 keli ashytqy jáne 300 jumyrtqa paıdalanylady dep josparlanǵan.
Alma bálishi «Taldyqorǵan baq qala» festıvali aıasynda ázirlenedi. Aıta keteıik, búginde ǵalymdar almanyń otany Qazaqstannyń Alataý bókteri ekenin dáleldep jatyr. Álemdegi alma ataýlysy sıvers almasynan (jabaıy almadan) taraǵan. Qazir jer júzindegi sıvers almasynyń 68 paıyzy Almaty oblysynda. Osyǵan baılanysty «Taldyqorǵan baq qala» jobasynyń maqsaty osy sıvers almasyn kóbeıtýge úles qosý.
Esterińizge sala keteıik, jyl basynda qala ákimdigi Táýelizdiktiń 25 jyldyǵyna 25 myń túp aǵash otyrǵyzý aktsııasyn bastaǵan bolatyn. Bul shara keıinnen «Taldyqorǵan baq qala» jobasyna ulasty. Onyń aıasynda búginge deıin shaharda 38 myń túp kóshet otyrǵyzyldy.
