Qazaqstandaǵy eń úzdik stýdenttik teatrlar anyqtaldy

ÓSKEMEN. QazAqparat – Óskemen qalasynda stýdentter teatrlarynyń respýblıkalyq festıvali ótti, dep habarlaıdy QazAqparat tilshisi.

Respýblıkalyq festıvalde túrli qalalardan kelgen 6 teatr ujymy óner kórsetti. Olardyń qatarynda S.Amanjolov atyndaǵy ShQÝ, «Turan» ýnıversıteti, Shákárim atyndaǵy ýnıversıtet, І.Jansúgirov atyndaǵy Jetisý ýnıversıteti, L.N. Gýmılev atyndaǵy Eýrazııa ulttyq ýnıversıteti jáne Semeı medıtsına ýnıversıteti bar. Daryndy jastar qoıǵan spektaklderdiń janrlary men taqyryptary ártúrli.

«Іlııas Jansúgirov atyndaǵy Jetisý ýnıversıtetinen keldik. Óskemen halqy bizdi óte jaqsy qarsy aldy. «Qoshtasqym kelmeıdi» atty qoıylymymyz kórermenge unady degen úmittemin», - deıdi «Jas túlek» stýdenttik teatrynyń akteri Nazıra Yntymaq.

Teatr ujymdary qoǵamdaǵy ózekti máselelerdi ashyq kórsete otyryp, mańyzdy taqyryptar arqyly jurtshylyqqa oı salýǵa umtyldy. Qazylar alqasy stýdenttik teatrlardy olardyń oıyny men teatr zańdylyqtaryn, óner ereksheligin saqtaý turǵysynan baǵalady.

Festıval qorytyndysy boıynsha І. Jansúgirov atyndaǵy Jetisý ýnıversıtetiniń «Qoshtasqym kelmeıdi» spektaklimen «Jas túlek» stýdenttik teatry jeńimpaz atandy. Stýdentterge 200 myń teńge kóleminde aqshalaı syılyq berildi.

Ekinshi oryndy «Qaragóz» qoıylymymen «Turan» ýnıversıteti ıelense, úshinshi oryndy L.Gýmılev atyndaǵy Eýrazııa ulttyq ýnıversıtetiniń «Shańyraq» stýdenttik teatry qanjyǵasyna baılady.

Festıvalde erekshe kózge túsken úzdik ártister de marapattaldy. «Úzdik áıel róli» nomınatsııasynda S.Amanjolov atyndaǵy ShQÝ-dyń birinshi kýrs stýdenti Janyl Tursynbaı «Tabamyn seni» qoıylymyndaǵy Zada rólin sátti oryndaǵany úshin jeńip aldy. Barlyq nomınanttar aqshalaı syılyqtarmen marapattaldy.