Qazaqstandaǵy eń úzdik degen fototýyndylar anyqtaldy
ASTANA. QazAqparat - QR Tuńǵysh Prezıdenti - Elbasy qory uıymdastyrǵan respýblıkalyq «Asyl mura» fotobaıqaýynyń jeńimpazdary anyqtaldy, dep habarlaıdy QazAqparat tilshisi
Baıqaý Qazaqstannyń jańa kórkem beınelerin qalyptastyrýdy, patrıotızmdi nyǵaıtýǵa yqpal etý men halqymyzdyń dástúrlerin nasıhattaýdy kózdeıdi.
Jarys túrli kásip ıeleriniń arasynda qyzyǵýshylyq týǵyzyp, oǵan 18-35 jas aralyǵyndaǵy memlekettik qyzmetshiler, kásibı jáne áýesqoı fotograftar, BAQ ókilderi jáne stýdentter qatysty.
Fotojumystardyń kóbi Astana, Almaty, Atyraý, Qaraǵandy, Taraz, Kókshetaý, Pavlodar, Mańǵystaý, Oral, Shymkent, Arqalyq, Qyzylorda, Aqtaý sııaqty qalalarynan, sondaı-aq Aqmola oblysynan da kelip tústi.
«Baıqaýdy ótkizý barysynda shyǵarmashyl jastardyń tarapynan úlken qyzyǵýshylyqty baıqadyq. Ádilqazylar alqasynyń qaraýyna 200-ge jýyq jumys kelip tústi. Biz tórt nomınatsııanyń ataýyn jaıdan jaı tańdap alǵan joqpyz. Olar adam men qoǵam úshin mańyzdy máselelerdi qamtıdy. Solardyń ishinde ásirese qazaqstandyqtardyń kúndelikti tynys-tirshiligimen baılanysty nomınatsııa qatysýshylary óz jumystaryn erekshe kórsete bildi, ıaǵnı olar qarapaıym ári ómirsheń. Aldaǵy ýaqytta atalǵan baıqaýdyń aýqymyn keńeıtip, fotograftardyń kóptep qatysý jaǵyn qarastyramyz»,- dedi QR Tuńǵysh Prezıdenti - Elbasy Qorynyń atqarýshy dırektory Qanat Jumabaev.
Tórt nomınatsııa boıynsha ótkizilgen fotobaıqaýǵa elimizdiń ár óńirinen barlyǵy 180-nen astam jumys kelip túsken Kásibı fotograftardan quralǵan ádilqazylar alqasy sonyń ishinen ár nomınatsııa boıynsha eń úzdik degen fotony tańdady.
Sonymen respýblıkalyq «Asyl mura» fotobaıqaýynyń jeńimpazdary:
Erlan Omarov - «Astananyń 20 jyldyǵy» nomınatsııasy;
Alekseı Poptsov, Saıfýllın Farıd - «Kúndelikti ómirdegi oqıǵa»;
Baqyt Sátbek - «Tulǵalar»;
Maksım Stadnıchenko - «Qazaqstan halqynyń mádenıeti men salt-dástúrleri» nomınatsııasy boıynsha tańdaldy.
«Baıqaýǵa eki nomınatsııa boıynsha jumystarymdy jiberdim. Ózim Astanada turyp, ár oqıǵanyń kýágeri bolyp júrgendikten qalanyń ómirin, turmysyn jaqsy bilemin. Usynǵan jumystarymnyń bireýi Astananyń 20 jyldyǵyna arnalǵan Atyraý oblysynyń syıǵa tartqan kópiriniń tóbeden túsirilgen sýreti. Ekinshisi Aq ordanyń kórinisinde túsirilgen egiz balanyń fotosy jáne qala kúngi merekelik otshashýdyń fotosy. Baıqaý úshin fotolardy tańdaý ońaıǵa túspedi, degenmen ózime jaqyn degen sýretterdi tańdaýǵa tyrystym. Onyń nátıjesin mine búgin kórip otyrmyz»,-dedi baıqaý jeńimpazy, «Egemen Qazaqstan» respýblıkalyq gazetiniń fototilshisi.
Jeńimpazdar «Asyl mura» konkýrsynyń laýreattary dep tanylyp, árqaısysy 350 myń teńge aqshalaı syılyqtarǵa ıe boldy.
Eske salsaq, buǵan deıin Elbasy qorynyń «Asyl mura» respýblıkalyq fotobaıqaýyn jarııalaǵany týraly habardar etkenbiz.
