Qazaqstandaǵy eń úlken kópirlerdiń biri jóndeýden ótedi
ASTANA. QazAqparat - Qalalyqtarǵa qaltqysyz qyzmet etip kelgen Semeı qalasyndaǵy aspaly kópir 2018 jyly tuńǵysh ret jóndeýden ótedi, dep habarlaıdy «QazAqparat» HAA tilshisi ShQO ákiminiń baspasóz qyzmetine silteme jasap.
Biregeı nysan qurylymynyń keı bólikteri birshama tozǵan. Aldaǵy ýaqytta olardy qalpyna keltirip, joldyń asfalt jabyndysyn aýystyrý jumystary júrgizilmek.
«Oblys ákimi Danıal Ahmetovtiń tapsyrmasy boıynsha mamandar kópirdegi jaǵdaıdy zerttep, «QazjolǴZI» AQ jabyndynyń quramy men onyń daıyndaý tehnologııasy boıynsha qorytyndy jasady. ShQO jolaýshylar kóligi jáne avtomobıl joldary basqarmasy basshysy Murat Musataev keńeıtilgen apparat otyrysynda habarlaǵandaı, aldyn ala júrgizilgen esep boıynsha jóndeý jumystaryna 241 mln teńge, sonymen qatar ózgeriske túsken jikti qalpyna keltirýge 173 mln teńge qajet. Jumysty bastaý 2018 jylǵa josparlanyp otyr», - dep habarlaıdy oblys ákiminiń baspasóz qyzmetinen.
Ertistiń eki jaǵasyn jalǵaǵan kópirdi qazaqstandyq kásiporyn qyzmetkerlerimen birge japondyq «IHI» fırmasy men «Alarko Alsım» atty túrik kompanııasynyń mamandary salǵan edi. Kópirdiń jalpy uzyndyǵy 1086 metrdi quraıdy. 2000 jyly paıdalanýǵa berilgennan keıin kópir birshama ýaqyt kútimsiz qalǵan.
Aıta keterligi, Semeı kópirine uqsas aspaly ótkeldiń álemde nebári 20-ǵa tarta túri bar. Onyń biri Bosfor buǵazy arqyly ótedi. Buǵan qosa, joldyń júretin bóligine Qazaqstanda joq tehnologııa qoldanylǵan. Seısmıkalyq berik ári biregeı kópir salý úshin qazynadan 100 mln teńge bólingen edi.
