Qazaqstandaǵy eń iri jylyjaı kesheni 4 myń tonna ónim jınady
ASTANA. QazAqparat - Elimizdegi eń iri jylyjaı kesheni osy jyldyń jarty jylynda 4 myń tonnaǵa jýyq ónim aldy. Gektaryna 300-350 tsentnerden ónim kóretin «Adelıa» jylyjaıy 16 gektar jerge qyzynaq pen qııar egip, jylyna eki ret ónim alyp otyr. Ordabasy aýdany, Badam aýylynda ornalasqan jylyjaı qojalyǵyna saparlaǵan BAQ ókilderi men blogerler aýqymy keń jumystyń qyr-syrymen tanysyp qaıtty, dep habarlaıdy QazAqparat óńir basshysynyń baspasóz qyzmetine silteme jasap.
Jylyjaıda frantsýz kompanııasynyń zamanaýı qondyrǵylary ornatylǵan. Munda jylytýdan bastap tamshylatyp sýarýǵa deıingi barlyq protsess kompıýtermen baqylanady.
Kásipkerdiń aıtýynsha, mundaǵy ósiriletin kókónister ekologııalyq taza ónim. Olardy ósirýde qoldanylatyn tehnologııa sý men tyńaıtqyshtardy jáne basqa da resýrstardy únemdeýge múmkindik beredi. Al jobanyń ózi elimizdiń eksporttyq áleýetin arttyrýǵa múmkindigi mol. Jınalǵan ónimniń basym bóligi Reseıge eksporttalsa, qalǵany Qazaqstannyń Almaty, Astana qalalaryna jiberiledi.
Indýstrıalandyrý kartasy aıasynda iske asqan bul jobany «QazAgroQarjy» aktsıonerlik qoǵamy qarjylandyrǵan. Atalmysh uıym 2011 jyly 440 mıllıon teńge kóleminde jeńildetilgen nesıe berse, 2013 jyly 2,2 mıllıard teńge kóleminde qarjy bólgen.
Jalpy oblys aýmaǵyndaǵy jylyjaıdyń jalpy kólemi 900 gektardan asady. Bul - Qazaqstandaǵy jylyjaı sharýashylyǵynyń shamamen 80 paıyzyn qurap otyr.
