Qazaqstandaǵy eń iri óndiristik qaldyq orny joıylady
AQTÓBE. QazAqparat - Aqtóbedegi Alǵa hımııa zaýytynyń aýmaǵy túgel zalalsyzdandyrylyp, óndiristik qaldyq joıylady. Bul jobaǵa 7 mıllıard teńge jumsalady, dep habarlaıdy QazAqparat tilshisi.
Aqtóbeniń Alǵa qalasynda S.Kırov atyndaǵy hımııa zaýyty boldy. Munda myńdaǵan adam jumys istep, óndiris orny 90 jyldardyń sońyna deıin saqtaldy. Bankrot bolǵan kompanııanyń qazir qańyraǵan nysandary ǵana qaldy. Bári ýly, zııandy bolǵan soń ony kómip, zalalsyzdandyrý qajet.
«Óndiris ornynyń eski ǵımarattarynda 40-tan astam qaldyq bar. Bul aýmaqtaǵy hımııalyq jáne óndiristik qaldyqtardy joıýǵa arnalǵan jobalyq-smetalyq qujatqa 100 mıllıon teńge jumsaldy. Bári 371 gektar bolady. Bul Qazaqstandaǵy eń iri óndiristik qaldyq orny. Ǵımarattardyń bári buzylyp, jer tegisteledi. Sol kezde Elek ózenine ketip jatqan zııandy qaldyqtar toqtap, aýa tazarady», - dedi «Jasyl damý» AQ departament basshysy Janna Asanova.
Negizgi jumys 2009 jyly bastaldy. Múlikti túgeldeý kezinde 17 nysannyń ıesi bar ekeni anyqtaldy. Olardyń keıbiri múlikti jalǵa alyp otyr. Jekeniń qolynda barlyǵy 7 jer telimi tirkelgen. Eski óndiristik qaldyq jınaqtaǵyshynda 15 mıllıon tonna, jańasynda 11 mıllıon tonna qaldyq bar. Al Alǵa hımııalyq zaýytynda 730 myń tonnadan astam óndiristik, hımııalyq qaldyq jatyr.
Aıta keteıik, Alǵa hımııalyq zaýytynyń ornyn zalalsyzdandyrýǵa 7 mıllıard teńge qajet. Qazir jobalyq-smetalyq qujat daıyndalyp, QR Energetıka mınıstrliginde qaralyp jatyr. Aldaǵy ýaqytta eski hımııalyq zaýyttyń ornyna Alǵa ındýstrıaldy aımaǵy salynady.
«Alǵadaǵy hımııa zaýytynyń jumysyn damytý josparda bar. Taıaýda Qytaıǵa baryp, «Nıtrohım» kompanııasynyń jumysyn jandandyrý jospary quryldy. Ári qaraı damytyp, qosymsha jumys oryndaryn ashamyz», - dedi Aqtóbe oblysynyń ákimi Berdibek Saparbaev.
