Qazaqstandaǵy eń arzan ashana - Astanada
ASTANA. QazAqparat - Astanadaǵy Sáken Seıfýllın atyndaǵy Agrotehnıkalyq ýnıversıtetiniń ashanasyn elordada ǵana emes, jalpy Qazaqstan boıynsha eń arzan ári qoljetimdi qoǵamdyq tamaqtaný orny dep ataýǵa bolady. Osylaısha, ýnıversıtet basshylyǵy stýdent jastardyń tamaǵyn toq qylyp, alańsyz bilim alýlaryna jaǵdaı jasap otyr. QazAqparat tilshisi qoljetimdi astyń sapasy men baǵasyn kórip, tamaqty eki, tipti úsh ese arzan satýdyń syryn bilgen bolatyn.
Ýnıversıtette ótken resmı sharaǵa barǵanda ondaǵy ashanada tamaqtyń birshama arzan ekenin bilmegen edik. Bastapqyda qatardaǵy ashanalardan eshbir aıyrmashylyǵy joq sekildi kóringen. Alaıda sórelerde tizilip turǵan toqash, keks jáne taǵy basqa jeńil-jelpi nan ónimderiniń baǵasyn kórgende kózimizdi bir ýqalap aldyq. Al bir lımon qosylǵan shaı men pıtstsany alǵanda odan da qatty tań qaldyq. «Sizden 95 teńge», - dedi kassır qyz.
Shydaı almaı, ystyq taǵamdardyń praısyna úńildik. Borş, sańyraýqulaq sorpasy, qyshqyltym kóje, úı kespesi, aşy kóje, as burshaq sorpasy bári - 85 teńgeden. Ekinshi taǵamǵa garnıry (etten, balyqtan istelgen tamaqqa qosylatyn tuzdyq, makaron, botqa túrleri) bar kotlet, qýyrdaq, laǵman, bıfshteks, teftel, taýyq eti, qýyrylǵan et (gýlıash), túshpara, frantsýzsha, armıansha, tipti «beıjińshe» jasalǵan et beriledi. Barlyǵy 165 teńgeden. 
Yńǵaıy kelip turǵannan soń ýnıversıtet basshylyǵyna jolyǵyp, ashana taǵamdaryn dámdi ári arzan qylýdyń sebebin bilgendi jón kórdik.
«Aldymen stýdentterdiń densaýlyǵyn oılaý kerek qoı. Sol sebepti biz oqý ǵımarattarynyń ishinde, sosyn árbir jataqhanada osyndaı ashanalardy ashtyq. Al tamaqtyń baǵasy nege arzan? Birinshiden, ashanaǵa qajetti bólmelerdi jalǵa alý qunyn qatty kótergen joqpyz. Odan paıda tapqymyz da kelmeıdi. Bastysy - sý, jaryq, jylý jáne taǵy basqa kommýnaldyq shyǵyndardy ótep otyrsa bolǵany. Jalǵa alýshyǵa bir ǵana shart qoıdyq, ol - taǵamnyń baǵasy arzan bolýy kerek. Árıne, tamaqtyń sapasy da baqylanady. Ony stýdentter ózderi tekseredi. Solardyń bastamasymen qurylǵan komıssııalar bar. Ashanalardy jasyryn túrde aralap, árbir taǵamnyń sapasyn, tipti salmaǵyn tekserip otyrady. Olar qaıda barady jáne qashan keledi, ony eshkim bilmeıdi. Eger tamaqtyń sapasy tómendese, jalǵa alýshylardy aýystyrý týraly usynystar jasalady», - deıdi ýnıversıtettiń birinshi prorektory Aıtjan Ábdirov.
Onyń aıtýynsha, búginde ýnıversıtet janynan kókónis ósirý de qolǵa alynǵan. Sony arzan baǵamen ashanalarǵa jetkizýdiń arqasynda tamaqtyń baǵasyn taǵy tómendetýge múmkindik bar. Budan bólek, bul jerde stýdenttik dúken men dárihana jumys isteıdi. Onda da taýardyń baǵasy naryqtan 20 paıyzǵa deıin arzan.
«Iá, tamaq jaǵynan bizge óte yńǵaıly. Astanadaǵy basqa ýnıversıtetterde oqyp jatqan qurby-qurdastarymyz sııaqty aqshany únemdep, daladan nan, maıonez, «bıch-paket» (jyldam ázirlenetin kespe - red) alyp júrmeımiz. Sabaq kezinde de, sabaqtan keıin de ashanaǵa baryp, tamaq ishemiz de, kitaphanaǵa, ıa bolmasa, basqa da qoǵamdyq jumystarmen aınalysýǵa kirisemiz. Úlkender stýdent bolǵan kezde asqazandy qurtyp aldyq dep jıi aıtady. Bizge ondaı qaýip tónip turǵan joq shyǵar», - deıdi stýdentter.
