Qazaqstandaǵy eń alǵashqy ónerkásiptik jel elektr stansasyna 3 jyl toldy
KÓKShETAÝ. QazAqparat - Ereımentaý aýdanyndaǵy jel elektr stansasy 3 jyl ishinde saǵatyna 500 mıllıon kVt-tan astam elektr qýatyn óndirdi, dep habarlaıdy QazAqparat tilshisi «Samuryq - Energo» AQ Úkimet jáne kommýnıkatsııalarmen baılanys keńsesine silteme jasap.
«EXPO-2017» halyqaralyq mamandandyrylǵan kórmesi osynda óndirilgen elektr qýatymen qamtamasyz etilgen bolatyn. Vedomstvonyń deregi boıynsha, aǵymdaǵy jyldyń tamyz aıynda Qazaqstandaǵy ónerkásiptik tıptegi alǵashqy jel elektr stansasynyń paıdalanýǵa berilgenine týra 3 jyl tolyp otyr. Nysan Aqmola oblysynyń Ereımentaý qalasy aýmaǵynda ornalasqan.
«2015 jyly Ereımentaý jel elektr stansasynyń memlekettik qabyldaý komıssııasy nysanǵa akt rásimdedi. 2015 jyldyń 11 jeltoqsanynda Elbasy N. Nazarbaevtyń qatysýmen tikeleı efırde ótken tele kópirde nysan iske qosyldy. Osy aralyqta qýaty 45 MVt jel elektr stansasy saǵatyna 500 mıllıon kVt-tan astam elektr qýatyn óndirdi. «Samuryq - Energo» AQ enshiles kompanııasy «Alǵashqy jel elektr stansasy» JShS jobasy Aqmola oblysynyń qýat tepe-teńdigin jaqsartý jáne qorshaǵan ortany qorǵaý turǵysynan alǵanda paıdasy zor boldy», - dep túsindirdi vedomstvodan.
Kompanııanyń jel stansasy árqaısysynyń qýaty 2,05 MVt bolatyn 22 jel qondyrǵysynan jáne 220/35KV podstansadan turady. Paıdalanýǵa berilgen ýaqyttan bastap, barlyǵy 23 jańa jumys orny ashyldy. Onyń 12-si - jergilikti turǵyndar. Jel elektr stansasynyń jumysy organıkalyq otyn paıdalanýsyz jáne SO2 qaldyqtarynsyz jylyna saǵatyna 172,2 mıllıon kVt elektr qýatyn óndirýge múmkindik beredi.
«Óndirilgen elektr qýaty Qazaqstannyń ulttyq elektr jelisine túsedi. Aıtalyq, «EXPO-2017» halyqaralyq mamandandyrylǵan kórmesi osynda óndirilgen elektr qýatymen qamtamasyz etildi», - dep tolyqtyrdy «Samuryq - Energo» AQ Úkimet jáne kommýnıkatsııalarmen baılanys keńsesindegiler.
Búgingi tańda «Samuryq - Energo» AQ kásiporyndary óndirgen elektr qýatynyń (kún sáýlesi, jel, shaǵyn GES) jalpy úlesinde jel elektr stansasynyń úlesi 1,5 paıyzdy quraıdy. 2017 jyly qazaqstandyq árbir úshinshi jasyl energııa kılovatt-saǵaty «Samuryq - Energo» AQ enshiles kompanııalaryna tıesili.
