Qazaqstandaǵy Elshilikter jyl saıyn qaıyrymdylyq jármeńkesin ótkizedi
Dástúrli sharaǵa qatysýǵa nıet bildirgen memleketter óz elinde nemese óz qolymen jasalǵan zattardy saýdalap, túsken qarjyny kómekke muqtaj jandarǵa úlestiredi. On jyldan beri ótkizilip kele jatqan ıgi shara bıyl da jalǵasyn tapty.
Japonııanyń qazaq elindegi Tótenshe jáne Ókiletti Elshisi Itıro Kavabatanyń jubaıy Megýmı búgingi sharaǵa úsh aı daıyndalypty. Kúnshyǵys elinen ydys-aıaq, kıim-keshekter aldyrǵan. Japon halqynyń jeńsik astarynyń mázirin jasaǵan. Jármeńkege keletin jurttyń kóńilinen shyǵatyn zattar usynýdy jón kórgen.
«Qyrkúıek aıynan beri daıyndaldyq. Sórege ne qoıamyz, sony oıladyq. Qazaq halqyna japon elin tanystyrýdyń bir sharasy sekildi ǵoı. Onyń ústine qaıyrymdylyq jármeńkesi. Bul - elshi jubaılary úshin úlken jaýapkershilik. Túsken qarjynyń qaıda jumsalatynyn jaqsy bilemiz. Sol sebepti barynsha kóp saýda jasaýdy oılaımyz», - deıdi Megýmı Kavabata, Japonııanyń Tótenshe jáne Ókiletti Elshisiniń jubaıy.
Qazaqstanda tirkelgen elshilerdiń jubaılary osydan on jyl buryn ortaq sheshimge kelip, jańa jyl qarsańynda qaıyrymdylyq jármeńkesin uıymdastyrýǵa ýaǵdalasqan. Sharaǵa atsalysýǵa nıet bildirgender qatary jyl saıyn artyp keledi. Mysaly, bıyl 53 elshilik óz ónimderin ortaǵa qoıdy. Munda belgili bir talap joq. Keıbir elshilikter ózderi daıyndaǵan buıymdardy saýdalaıdy. Kóbine óz elderinde shyǵatyn, suranysqa ıe ónimderdi sórege qoıady.
«Bul ózi - shet elderde baıaǵydan kele jatqan dástúr. Qazaqstanda on jyl buryn tusaýy kesildi. Elshilerdiń jubaılary júzege asyryp kele jatqan shara. Byltyr bir kúnde 110 myń AQSh dollarynan asatyn qarjy tústi. Ony elimizdegi kómekke zárý jetpis uıymǵa bólip berdi. Jáne Altaıdan Atyraýǵa deıingi, Arqa men Alataýǵa deıingi aımaqtar, búkil Qazaqstan túgel qamtyldy. Ras, búkil máseleni sheship tastamaıtyn shyǵar. Biraq ıgi is ekeni anyq qoı», - dedi QR Syrtqy ister mınıstriniń orynbasary Roman Vasılenko.
Igi is ekeni ras. Sebebi kelýshiler osyndaǵy buıymdardy satyp alyp, qaıyrymdylyq sharaǵa úles qosady. Sondaı-aq munda lotoreıa oınatylady. Elshiler jubaılary klýbynyń prezıdenti Heba Osmannyń aıtýynsha, júlde qory qomaqty, qazirdiń ózinde jeti myń bılet satylyp ketipti.