Qazaqstandaǵy elektrondy oqytý júıesimen alǵashqy kezeńde mektepterdiń 50 paıyzy qamtylady
ASTANA. 13 sáýir. QazAqparat /Arman Asqarov/ - 2011-2015 jyldary elimizdegi bilim berý uıymdarynyń 50 paıyzy elektrondy oqytý júıesimen qamtylatyn bolady.
Al 2016-2020 jyldarǵa eseptelgen ekinshi kezeńde bul kórsetkishti 90 paıyzǵa deıin jetkizý josparlanyp otyr. Bul týraly búgingi baspasóz máslıhatynda QR Bilim jáne ǵylym mınıstrligi Strategııalyq josparlaý jáne aqparattyq tehnologııalar departamentiniń dırektory Nurǵalı Arshabekov málim etti.
Onyń habarlaýynsha, atalǵan júıe aıasynda 2011-2012 jańa oqý jylynda Astana, Almaty jáne Qaraǵandy oblysynyń 44 bilim berý uıymdarynda pılottyq joba iske asyrylady. 2012 jyly jobaǵa qatysatyn bilim berý mekemeleriniń sany 537-ge deıin jetse, 2013 jylda olardyń sanyn 926-ǵa deıin jetkizý kózdelip otyr. Búginde osy úsh jylǵa respýblıkalyq bıýdjette 39,5 mlrd. teńge qarastyrylǵan.
Aıta keteıik, elektrondy oqytý júıesiniń negizgi maqsaty - aýyl jáne qala mektepteriniń bilim deńgeıin teńestirý.
